Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 281 Hüküm no: 172 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İslam Yazıcı’nın, merhum Ali Yazıcı’nın zimmetindeki alacağını vasîden talep ettiği Mahmiye-i İstanbulˈda Balat kurbünde Hoca Kasım Gönânî mahallesi sükkânından râfiʽ-i hâzeˈl-kitâb İslâm Yazıcı b. Ali meclis-i şerʽ-i hatîr-i lâzımüˈt-tevkīrde mahrûse-i Galata aʽmâlînden kasaba-i Tophâneˈde Cihangir mahallesi sükkânından olup bundan akdem Azak nâm mahâlde vefât eden Ali Yazıcıˈnın vasî-i muhtârı olmağla terekesine vâziʽüˈl-yed olan el-Hâc Beşir b. İsmail mahzarında üzerine daʽvâ ve takrîr-i kelâm edip müteveffâ-yı mezbûr Ali Yazıcı zimmetinde cihet-i karz-ı şerʽîden yüz otuz kıtʽa esedî guruş hakkım olup kableˈl-edâ vefât etmekle hâlâ meblağ-ı merkūmu tereke-i vâfiyesinden taleb ederiz suâl olunup alıverilmesi murâdımdır dedikde gıbbeˈs-suâl ve akībeˈl-inkâr müddeʽî-i mezbûrdan daʽvâsına beyyine taleb olundukda udûl-ı Müslimînˈdenve sıkāt-ı muvahhidînden Hasan b. Abdullah ve Yedekci Ahmed Beşe b. Mustafa nâm kimesneler li-ecliˈş-şehâde meclis-i şerʽa hâzırân olup isreˈl-istişhâd fiˈl-hakīka müddeʽî-i mezkûr İslâm Yazıcı târih-i kitâbdan üç ay mukaddem müteveffâ-yı mezkûr Ali Yazıcıˈya Azak Limanıˈndan sefînesi içinde kendi mâlından yedi yüz otuz kıtʽa guruş ifrâz teslîm ol dahi huzûrumuzda ikrâz-ı vâhid ve kabz eyledi biz bu husûsa şâhidleriz şehâdet ederiz deyü her biri edâ-i şehâdet-i şerʽiyye eylediklerinden sonra gıbbeˈt-taʽdîl veˈt-tezkiye şehâdetleri makbûle olmağın gıbbeˈt-tahlîfiˈş-şerʽî mûcebiyle baʽdeˈl-hükm mâ vakaʽa biˈt-taleb ketb olundu. Fiˈl-hâmis veˈl-işrîn min-şehri Rebîʽiˈl-âhir li-sene erbaʽa ve semânîn ve elf. Şuhûdüˈl-hâl: Mâ-sebak