Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 280 Hüküm no: 171 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Yazıcı’nın, merhum Ali Reis ile ortak oldukları geminin hasılatından alacağını varislerden talep ettiği Mahrûse-i Galata aʽmâlînden kasaba-i Tophâneˈde Cihangir mahallesinde râfiʽüˈl-vesîka Ali Yazıcı b. Mustafa meclis-i şerʽ-i şerîfde mahalle-i mezbûrede sâkin olup bundan esbak Karadenizˈde Azak nâm mahâlde vefât eden Ali Reis b. Ahmedˈin evlâd-ı sıgārı Hasan ve Ahmed ve İbrahimˈin tesviye-i emirlerine vasî-i muhtârları olan el-Hâc Beşir b. İsmail mahzarında üzerine daʽvâ ve takrîr-i kelâm edip müteveffâ-yı mezbûr Ali Reis ile hayatında biˈl-iştirâkiˈs-seviy mutasarrıf olduğumuz yirmi iki zirâʽ şayka taʽbîr olunur sefînemizin Varna seferinden hâsıl olan yirmi bir bin sekiz yüz akçenin nısfı ki on bin dokuz yüz akçe ve Kerş seferinden hâsıl olup müstakillen hisseme isâbet eden on sekiz bin beş yüz akçe ki min-haysüˈl-mecmûʽ yirmi dokuz bin dört yüz akçeyi hayatında bana defʽ ve teslîm etmeyip meblağ-ı mezbûru kendi mesârifine sarf ve istihlâk etmekle zimmetinde kalmışdı hâlâ terekesinden olmak üzre vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden Şa‘bân Reis b. Musa ve İslâm Yazıcı b. Ali nâm kimesneler li-ecliˈş-şehâde meclis-i şerʽa hâzırûn olup isreˈl-istişhâd fiˈl-vâkiʽ müteveffâ-yı mezbûr Ali Reis hayatında müddeʽî-i mezbûr ile biˈl-iştirâkiˈs-seviy mutasarrıf oldukları sefînenin Varna seferinden hâsıl olan fâideyi huzûrumuzda hesâb eylediklerinde yirmi bir bin sekiz yüz akçeye bâliğa olup meblağ-ı mezbûrun nısfı on bin dokuz yüz akçe müddeʽî-i mezbûrun hissesine isâbet edip kezâlik Kerş seferinden hâsıl olan fâideyi dahi hesâb eylediklerinde on sekiz bin beş yüz akçe yine merkūm Ali Yazıcıˈnın nısf hissesine isâbet edip cemʽan zikirleri mürûr eden seferlerden yirmi dokuz bin dört yüz akçe müddeʽî-i mezbûrun hissesine isâbet eyledikden sonra mezbûr Ali Reis meblağ-ı mezbûr içün zimmetimdedir deyü kirâren ikrâr ve bizi işhâd eyledi biz bu husûsa şâhidleriz şehâdet ederiz deyü her biri edâ-i şehâdet-i şerʽiyye eylediklerinde gıbbe riʽâyet-i şerâyitiˈl-kabûl şehâdetleri makbûle oldukdan sonra müddeʽî-i mezbûr baʽdeˈt-tahlîf mûcebiyle hüküm birle mâ vakaʽa biˈt-taleb ketb olundu. Fiˈs-sâlis min-Cumâdelûlâ li-sene erbaʽa ve semânîn ve elf. Şuhûdüˈl-hâl: el-Hâc Veli b. ( ), Yedekci Ahmed Beşe b. Ali, Hüseyin Ağa b. ( ), Eyüb Çelebi b. Ömer