Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 282 Hüküm no: 174 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva’nın, merhum kocası Abdurrahman Çelebi’deki alacağını vasîden talep ettiği Mahmiye-i Galata muzâfâtından kasaba-i Tophâneˈde Firuzağa mahallesinde sâkin iken bundan akdem vefât eden Abdurrahman Çelebi b. Caferˈin verâseti zevce-i metrûkesi Havva Hatun bt. Yusuf ile sulbî sagīr oğulları Abdullah ve Abdurrahim ve sagīre kızı Âişeˈye ve firâşından hâsıl hamle münhasıra olduğu şerʽan zâhir oldukdan sonra işbu bâʽisüˈl-vesîka mezbûre Havva meclis-i şerʽde sıgār-ı mezkûrînin tesviye-i umûrlarına kıbel-i şerʽîden mansûb vasîleri olup tereke-i müteveffâ-yı mezbûre vâziʽüˈl-yed olan Ali Ağa b. Ahmed mahzarında üzerine daʽvâ ve takrîr-i kelâm edip müteveffâ-yı mezbûr zimmetinde cihet-i deyn-i şerʽîden olan elli esedî guruşumu kableˈl-istifâ fevt olup hâl-i hayatında meblağ-ı mezbûr zimmetinde hâlâ bana deyni olduğu alâ-ruûsiˈl-işhâd ikrâr ve işhâd dahi etmekle hâlâ terekesine vâziʽüˈl-yed olan mezbûr Ali Ağaˈdan meblağ-ı mezbûru taleb ederim suâl olunsun dedikde gıbbeˈs-suâl veˈl-inkâr müddeʽiyye-i mezbûreden müddeʽâsına beyyine taleb olundukda yine mahalle-i mezbûrede sâkine Hasan Beşe b. Osman nâm kimesne ile Hadîce bt. Hasan Çavuş ve Kâtibe bt. Abdullah nâm hatunlar li-ecliˈş-şehâde meclis-i şerʽa hâzırûn olup isreˈl-istişhâd fiˈl-hakīka müteveffâ-yı mezbûr hayatında zevcem Havvaˈya cihet-i deyn-i şerʽîden elli esedî guruş zimmetimde deynim vardır deyü huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde isre riʽâyet-i şerâyitiˈl-kabûl şehâdetleri makbûle oldukdan sonra müddeʽiyye-i mezbûre baʽdeˈt-tahlîfiˈl-muʽteber mûcebiyle hüküm birle mâ vakaʽa biˈt-taleb ketb olundu. Fiˈl-yevmiˈl-hâmis veˈl-işrîn min-şehri Rebîʽiˈl-âhir li-sene erbaʽa ve semânîn ve elf. Şuhûdüˈl-hâl: Şa‘bân Efendi b. Hüseyin, Ali Bey b. Ahmed, Musa Halîfe b. Ahmed, Mustafa Çelebi b. Mansur, İsa Bey b. Halil, Mustafa Çelebi b. Osman