Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 284 Hüküm no: 177 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Fatma bt. Ahmed Odabaşı’nın amca oğlu olduğunu ispat eden Ahmed b. Ramazan’ın, terekenin beytülmal emininden alınıp kendisine verilmesini talep ettiği Mahrûse-i Galata muzâfâtından İstinye nâhiyesinde nefs-i İstinyeˈde sâkin işbu bâʽisüˈl-kitâb Ahmed b. Ramazan nâm kimesne meclis-i şerʽ-i hatîr-i lâzımüˈt-tevkīrde mahrûse-i mezbûrede kasaba-i Tophâne mahallâtından Cihangir mahallesinde sâkine iken bundan akdem müteveffât olan Fatma bt. Ahmed Odabaşı nâm sagīrenin zevc-i metrûkundan gayrı zâhirde vâris-i maʽrûfu olmamak zuʽmıyla muhallefâtına vâziʽüˈl-yed olan hâlâ mahrûse-i mezkûrede ve tevâbiʽinde emîn-i beytü›l-mâl olan Mehmed Ağa b. Ahmed mahzarında üzerine daʽvâ ve takrîr-i kelâm edip müteveffât-ı mezkûrenin babası mezbûr Ahmed Odabaşıˈnın ibn-i ammı ve usûbet-i nesebiye cihetinden vârisi olup hatta kendisi sıhhatinde iken benim babam mezbûr Ramazan içün li-ebeveyn ammimdir ve benim içün işbu Ahmed mezbûr Ramazanˈın sulbî oğlu ve benim dahi ber-vech-i muharrer ammim oğludur vefâtımda verâsetim sagīre kızım müteveffât-ı mezkûre Fatma ile bunlara münhasıradır deyip alâ-ruûsiˈl-işhâd ikrâr edip işhâd eyledikden sonra kendisi müteveffâ olup benim baʽdehû babam vefât eyleyip kableˈl-kısme hâlâ mezkûre Fatma dahi müteveffât olup muhallefâtının nısfı bana ve nısf-ı âharı zevci Ali Beşe b. Mustafa Beşeˈye müntakil ve musâb iken mûmâ-ileyh Mehmed Ağa bi-gayr-ı vech-i şerʽî vazʽ-ı yed edip suâl olunup kasr-ı yedine tenbîh olunmak murâdımdır dedikde gıbbeˈs-suâl veˈl-inkâr müddeʽî-i mezbûrdan daʽvâsına mutâbık beyyine taleb olundukda udûlden es-Seyyid Mustafa Kapudan b. Murad ve el-Hâc Veli Reis b. ( ) ve el-Hâc Ali b. İsmail ve Mustafa b. Ramazan ve İsmail b. Yusuf ve diğer Mustafa b. Ali ve Ahmed b. Ali nâm kimesneler li-ecliˈş-şehâde hâzırûn olup isreˈl-istişhâd fiˈl-hakīka müteveffâ-yı mezbûr Ahmed Odabaşı sıhhatinde iken müddeʽî-i mezbûr içün benim li-ebeveyn ammim oğludur babası mezbûr Ramazan ber-vech-i muharrer ammimdir vefâtımda verâsetim sulbiye sagīre merkūme işbu müteveffât-ı mezkûre Fatma ile bunlara münhasıradır bunlardan gayri vârisim yokdur deyü bizim huzûrumuzda ikrâr ve bizi işhâd eylediğinden sonra mezbûr Ahmed Odabaşı vefât eyleyip baʽdehû merkūm Ramazan dahi vefât edip kableˈl-kısme mezkûre Fatma dahi müteveffât olup ber-vech-i muharrer hâlâ mezkûre (...?)nlardan gayrı vâris-i âharı olmadığı maʽlûmumuz değildir bizi bu husûsa şâhidleriz şehâdet dahi ederiz deyü her biri edâ-i şehâdet-i şerʽiyye eylediklerinde gıbbe riʽâyet-i şerâyitiˈl-kabûl şehâdetleri makbûle olmağın mûcebiyle emîn-i mûmâ-ileyh Mehmed Ağaˈya tenbîh olunup mâ vakaʽa biˈt-taleb ketb olundu. Fiˈl-yevmiˈl-âşir min-Cumâdelûlâ li-sene erbaʽa ve semânîn ve elf. Şuhûdüˈl-hâl: Şa‘bân Çavuş el-mübâşir, İbrahim Çelebi b. Abdülbaki, Ömer Efendi b. Ali, Hasan b. Abdullah