Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 289 Hüküm no: 183 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Ramazan’ın, merhum Ali Reis b. Ahmed’in zimmetindeki alacağını varislerinden talep ettiği Mahrûse-i Galata a‘mâlinden kasaba-i Tophâneˈde Cihangir mahallesi sükkânından râfi‘-i hâzeˈl-kitâb el-Hâc Veli b. Ramazan meclis-i şer‘-i hatîr-i lâzımüˈt-tevkīrde mahalle-i mezbûre sükkânından olup bundan mukaddem vefât eden Ali Reis b. Ahmedˈin sulbî sagīr oğulları Hasan ve İbrahim ve Ahmedˈin tesviye-i emirlerine kıbel-i şerî‘at-i mergūbeden mansûbe vasîleri ve vâlideleri olan Havva bt. Abdullah nâm hatun mahzarında üzerine da‘vâ ve takrîr-i kelâm edip müteveffâ-yı mezbûr Ali Reis yedinden bir sene mukaddem mâlımdan oğlum [42b] Ahmed yediyle bir def‘a yirmi kıt‘a esedî guruş ve kendi yedimle bir def‘a yirmi kıt‘a esedî guruş ki min-haysüˈl-mecmû‘ kırk kıt‘a esedî guruş ikrâz ve teslîm ol dahi vech-i meşrûh üzre ikrâz ve kabz eyleyip kableˈl-edâ fevt olup hâlâ meblağ-ı mezbûru tereke-i müteveffâ-yı mezbûrdan taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden olup mahalle-i mezbûre sâkinlerinden Ali Yazıcı b. Mustafa ve Mehmed Yazıcı b. Mehmed nâm kimesneler li-ecliˈş-şehâde meclis-i şer‘a hâzırûn olup istişhâd olunduklarında fiˈl-hakīka işbu müdde‘î el-Hâc Veli müteveffâ-yı mezbûr Ali Reisˈe bir sene mukaddem mâlından oğlu Ahmed yediyle bir def‘a yirmi kıt‘a esedî ve kendi yedimle [bir] def‘a dahi yirmi kıt‘a esedî guruş cem‘an kırk kıt‘a esedî guruş ikrâz ve teslîm ol dahi meblağ-ı mezbûru vech-i meşrûh üzre huzûrumuzda iktirâz ve tesellüm eyledi biz bu husûsa bu vech üzre şâhidiz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra gıbbeˈt-tahlîfiˈş-şer‘î mûcebiyle hükmolunup mâ vaka‘a biˈt-taleb ketb olundu. Fiˈs-sâbi‘ min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: Mâ-sebak