Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 288 Hüküm no: 182 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in, merhum Ali Reis b. Ahmed’deki kılıç semeninden alacağını varislerinden talep ettiği Mahrûse-i Galata a‘mâlinden kasaba-i Tophâneˈde Cihangir mahallesi sükkânından râfi‘-i hâzeˈl-kitâb el-Hâc Mehmed b. İbrahim meclis-i şer‘-i hatîr-i lâzımüˈt-tevkīrde mahalle-i mezbûre sükkânından olup Karadenizˈde Azak nâm mahâlde bundan akdem vefât eden Ali Reis b. Ahmedˈin sulbî sagīr oğulları Hasan ve Ahmed ve İbrahimˈin vasî-i muhtârları olduğu ledeˈş-şer‘iˈl-mutahhar sâbit olan el-Hâc Beşir b. İsmail mahzarında üzerine da‘vâ ve takrîr-i kelâm edip müteveffâ-yı mezbûr Ali Reis hayatında yedimden iştirâ ve kabz eylediği ma‘lûmüˈl-vasf veˈl-aded kılıç semeninden zimmetinde yirmi yedi kıt‘a esedî guruş hakkım olup meblağ-ı mezbûrun on esedîsini hayatında yedinden ahz u kabz edip bâkī zimmetinde on esedî guruş hakkım kalıp kableˈl-edâ vefât etmekle hâlâ meblağ-ı bâkī-i mezbûru terekesinden taleb ederin suâl olunsun dedikde gıbbeˈs-suâl veˈl-inkâr ve isre talebiˈl-beyyine udûl-ı Müslimînˈden olup mahalle-i mezbûre sükkânından Hacı Ali b. Mehmed ve Ali b. Receb nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-hakīka müteveffâ-yı mezbûr Ali Reis hayatında bizim huzûrumuzda işbu müdde‘î el-Hâc Mehmed yedinden ma‘lûmüˈl-aded veˈl-vasf yirmi yedi esedîlik kılıç iştirâ ve kabz eyledi biz bu husûsa şâhidiz şehâdet dahi ederiz her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr vasî-i mu‘arrif olduğu meblağ-ı mezbûr on esedî guruşdan mâ‘adâsı müteveffâ-yı mezbûrun hayatında küllen ve ba‘zan ahz u kabz ve taraf-ı şer‘iyeden bir tarîk ile zimmetini ibrâ etmediğine gıbbeˈt-tahlîfiˈş-şer‘î mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâbi‘ min-şehri Rebî‘iˈl-âhir li-sene erba‘a ve semânîn ve elf. Şuhûdüˈl-hâl: Mâ-sebak