Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 291 Hüküm no: 185 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Bayram’ın, merhum kocası Mahmud Beşe’deki alacağını vekili aracılığıyla tahsil ettiği Kasaba-i Kasımpaşaˈda Câmi‘-i Kebîr mahallesinde sâkin iken bundan akdem vefât eden Mahmud Beşe b. Mustafa nâm kimesnenin verâseti zevce-i metrûkesi İsmihan bt. Bayram ile ve li-ebeveyn kız karındaşı Fatmaˈya münhasıra oldukdan sonra mezbûre İsmihanˈın ikrâr-ı âtiˈl-beyâna vekîl olup mezbûrenin zâtını ma‘rifet-i şer‘iye ile ârifân olan Ivaz Efendi b. Halil ve Yakub b. Ali şehâdetleriyle şer‘an vekâleti sâbit olan Hasan b. Yusuf meclis-i şer‘de merkūme Fatma tarafından zikri câ’î ikrârı tasdîka vekîl olup merkūmenin zâtını ma‘rifet-i şer‘iye ile ârifân olan Ömer Efendi b. Ahmed ve Abdullah Efendi b. Mahmud şehâdetleriyle şer‘an vekâleti sâbit olan el-Hâc Mustafa b. Hasan mahzarında biˈl-vekâle ikrâr ve takrîr-i kelâm edip müvekkilem mezbûrenin zevci müteveffâ-yı merkūm zimmetinde ma‘kūdun-aleyh elli esedî [43a] guruş hakkını kableˈl-ahz fevt olmağla mezbûru merkūmeden ba‘deˈd-da‘vâ veˈl-isbât meblağ-ı mezbûrun edâsı’çün hükm-ı şer‘î lâhık olmuşdu elhâletü hâzihî mezbûr elli esedî guruş mutâlebesinden biˈl-vekâle mezbûre Fatmaˈnın zimmetini ibrâ-i âmm ile ibrâ ve ıskāt eyledim dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-hâmis veˈl-işrîn li-sene erba‘a ve semânîn ve elf. Şuhûdüˈl-hâl: Mustafa Beşe b. Ahmed el-mübâşir, Ömer Efendi b. el-Hâc Ali, Köse Mahmud b. Mahmud, Ahmed Çelebi b. Memi, Mustafa b. Arslan, İsmail b. Mustafa