Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 298 Hüküm no: 192 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Meryem bt. Habib’in kız kardeşi Fatma’ya, Havva’nın vasî tayin edildiği Mahrûse-i Galataˈya tâbi‘ kasaba-i Tophâne mahallâtından İbrahim Efendi mahallesinde sâkine iken bundan akdem müteveffiye olan Meryem bt. el-Hâc Habib nâm sagīreden li-ebeveyn kız karındaşı Fatma nâm sagīreye müntakil ve mevrûs mâlını hıfz içün bir vasî nasbından lâ-büd olmağın mahalle-i mezbûrede sâkine işbu râfi‘atüˈl-kitâb Havva bt. ( ) nâm hatun her vecihle vesâyete ehil olmağla hâkim-i muvakki‘-i kitâb tûbâ-lehû ve hüsnü- me’âb mezbûreyi sagīre-i merkūme üzerine ber-vech-i muharrer vasî nasb ta‘yîn ettikde ol dahi vesâyet-i mezbûreyi kabûl ve hizmet-i lâzımesini edâya müte‘ahhid olmağın mâ vaka‘a biˈt-taleb ketb olundu. Fiˈl-yevmiˈl-hâmis-i aşer min-Cumâdelûlâ li-sene erba‘a ve semânîn ve elf. Şuhûdüˈl-hâl: İbrahim Efendi b. Şa‘bân, Ömer b. Himmet, Ebûbekir b. Mustafa, Ömer Efendi b. Hüseyin, Ahmed el-muhzır