Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 297 Hüküm no: 191 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Fatma bt. Dilaver’in terekesinin, vasî tarafından kocası Mustafa’dan teslim alındığı Mahrûse-i Galata a‘mâlinden kasaba-i Kasımpaşaˈda el-Hâc Ahmed mahallesi sükkânından iken bundan mukaddem vefât eden Fatma bt. Dilaverˈin verâseti zevci Mustafa Beşe b. Fazlullah ve vâlidesi Sâliha bt. Abdullah nâm hatun ile li-üm kız karındaşı Safiye nâm kebîre ve li-ebeveyn kız karındaşları Râbia ve Âişe ve Hadîce nâm sagīrelere münhasıra olduğu şer‘an zâhir ve mütehakkık oldukdan sonra merkūme Sâliha Hatun ile sagīrât-ı mezkûrâtın kıbel-i şer‘den tesviye-i emirlerine vasî-i mansûbları olan merhûm İbrahim Hanzâde Ali Bey Efendi taraflarından husûs-ı câ’iˈz-zikrin ikrâra vekîl olup nehc-i tarîk-i şer‘î üzre vekâleti sâbite olan Ali Bey b. Şa‘bân nâm kimesne meclis-i şer‘de râfi‘-i hâzeˈl-kitâb mezkûr Mustafa b. Fazlullah mahzarında her biri asâleten ve vekâleten ikrâr ve takrîr-i kelâm edip mûrisemiz müteveffât-ı mezbûrenin muhallefâtından biˈl-ırsiˈş-şer‘î defter-i kassâm-ı askerî nâtık olduğu vech üzre her birimize isâbet ve intikāl eden hisselerimizi biˈt-tamam veˈl-kemâl ahz u kabz eyledik min-[ba‘d] muhallefât-ı müteveffâ-yı mezbûra müte‘allika vechen mineˈl-vücûh hak ve alâkamız kalmadı dediklerinden sonra mezkûr Mustafa Beşe dahi meclis-i mezbûrda takrîr-i kelâm edip ben dahi muhallefât-ı merkūmeden vech-i meşrûh üzre hissemi tamamen ahz u kabz eyledim ba‘deˈl-yevm ben[im]dahi muhallefât-ı merkūmeye müte‘allika hak ve alâkam kalmadı dedikde gıbbeˈt-tasdîk mâ vaka‘a biˈt-taleb ketb olundu. Fiˈl-yevmiˈs-sâlis-i aşer min-Cumâdelûlâ li-sene erba‘a ve semânîn ve elf. Şuhûdüˈl-hâl: Mehmed Efendi b. ( ) el-imâm, Ali Çelebi b. Abdullah, Şahin b. Abdullah, Hüseyin b. İbrahim, Ali Bey b. Halil