Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 306 Hüküm no: 197 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Barli’nin, merhum Yeğen Mehmed Kapudan b. Rıdvan’ın azatlı kölesi olduğu İşbu uzun boylu, açık kaşlı, sarışın, mültehi Rusiyyüˈl-asl bâ‘isüˈs-sifr Barli v. ( ) meclis-i şer‘de Şahkulu mahallesinde sâkin iken bundan akdem vefât eden Yeğen Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmed Kapudan ile vâlidesi Hadîce Hatun bt. Hasanˈa münhasıra olduğu şer‘an zâhir ve müte‘ayyin oldukdan sonra mezbûretân Âişe Hanım ve Hadîce Hatun taraflarından zikri câ’î husûsda vekîl-i müseccelleri olan Ramazan Çelebi b. Yusuf mahzarında üzerine da‘vâ ve takrîr-i kelâm edip müteveffâ-yı mezbûr hâl-i marazında mevtinden on beş gün mukaddem mâlından ifrâz edip i‘tâk etmişken ve benim kıymetim mevlâm müteveffâ-yı mezbûrun terekesinin sülüsüne müsâ‘id iken hâlâ mütevekkiletân-ı mezbûretân bana rakīk olmak üzre vaz‘-ı yed murâd ederler suâl olunup üzerimden yed-i âdiyeleri nez‘ olunması murâdımdır dedikde gıbbeˈs-suâl veˈl-inkâr mezbûr Barliˈden müdde‘âsına beyyine taleb olundukda udûl-ı Müslimînˈden olup mahalle-i mezbûrede müezzin olan Mehmed Çelebi b. Mustafa ve Halil Çelebi b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīkamüteveffâ-yı mezbûr hâl-i marazında târih-i mezbûrda bizim huzûrumuzda gulâm-ı mezkûrûnu hasbeten lillâh i‘tâk edip veresenin sülüsü dahi gulâm-ı mezkûrun kıymetine müsâ‘id olmağla sâir ahrâr gibi hür olmuşdur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâyitiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈs-sâlis veˈl-işrîn min-Cumâdelûlâ li-sene erba‘a ve semânîn ve elf. Şuhûdüˈl-hâl: Hasan Efendi b. Abdülgafur, Ahmed Efendi b. Mustafa el-imâm, Osman Beşe b. Ali, Ahmed Beşe b. Osman, Ali Bey b. Halil, Hüseyin Çelebi b. Ali