Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 307 Hüküm no: 198 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan’ın, merhum Yeğen Mehmed Kapudan b. Rıdvan’ın azatlı kölesi olduğu İşbu orta boylu, açık kaşlı, şehlâ, Rusiyyüˈl-asl işbu râfi‘üˈr-rakīm Yuvan v. ( ) meclis-i şer‘de mahmiye-i Galata hâricinde Şahkulu mahallesinde sâkin iken bundan akdem vefât eden Yeğen Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmed Kapudan ile vâlidesi Hadîce Hatun bt. Hüseyinˈe münhasıra olduğu şer‘an zâhir ve müte‘ayyin oldukdan sonra merkūmetân Âişe ve Hadîce taraflarından husûs-ı âtiˈz-zikre vekîl olup nehc-i şer‘î mu‘teber üzre şer‘an vekâleti sâbite olan Ramazan Çelebi b. Yusuf mahzarında üzerine da‘vâ ve takrîr-i kelâm edip ben müteveffâ-yı mezbûrun abd-i memlûku olup mülkünde olduğum hâlde târih-i kitâbdan iki sene mukaddem beni hasbeten lillâh-i te‘âlâ mâlından ifrâz edip i‘tâk etmişken hâlâ müvekkiletân-ı mezbûretân bana rık olmak üzre vaz‘-ı yed murâd ederler suâl olunup yed-i âdiyeleri üzerimden nez‘ olunması matlûbumdur dedikde gıbbeˈs-suâl veˈl-inkâr müdde‘î-i mezbûrûn müdde‘âsına beyyine taleb olundukda udûl-ı Müslimînˈden olup mahalle-i mezbûre sâkinlerinden Mehmed Çelebi b. Mustafa el-müezzin ve Halil Çelebi b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr târih-i merkūmda abd-i memlûku olan mezkûr Yuvanˈı bizim huzûrumuzda mâlından ahrâr edip i‘tâk eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâyitiˈl-kabûl şehâdetleri makbûle oldukdan sonra mûcebiyle mezkûr Yuvanˈın ı‘tkına ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâlis veˈl-işrîn min-Cumâdelûlâ li-sene erba‘a ve semânîn ve elf. Şuhûdüˈl-hâl: Hasan Efendi b. Abdülgafur, Ahmed Efendi el-imâm, Ömer Efendi b. Ali, İsa Bey b. Halil, Hüseyin Çelebi b. Ali, Ahmed Beşe b. Abdullah, Ahmed Çavuş el-mübâşir, Ali Beşe b. Osman