Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 748 Hüküm no: 969 Orijinal metin no: [115b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan Beşe b. Mustafa’nın, Şaban Beşe’den beygir bahasından alacağı olduğu iddiasında mühlet verildiği Dergâh-ı âlî -dâme merci‘an li’l-e‘âlî- yeniçerilerinin otuzuncu ağa bölüğüne mahsûs oda ahâlîsinden işbu bâ‘isü’l-kitâb Ramazan Beşe b. Mustafa meclis-i şer‘-i hatîr-i lâzımü’t-tevkīrde yine oda-i mezbûr ahâlîsinden Şaban Beşe b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan bir buçuk sene mukaddem bir re’s doru iğdiç bârgirimi mezbûr Ramazan Beşe’ye altmış kıt‘a esedî guruşa bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eylediğinden sonra semeni olan meblağ-ı mezbûr zimmetinde kalmışidi hâlâ taleb ederim suâl olunsun dedikde gıbbe’s-suâl mezbûr Şaban Beşe cevâbında zikr olunan bârgiri târih-i mezbûrda müdde‘î-i mezbûrdan ancak elli kıt‘a esedî guruşa iştirâ ve tesellüm etmişidim deyû ikrâr ve ziyâdeye kabûlünü inkâr edicek müdde‘î-i mezbûrdan ziyâdeye beyyine taleb olundukda ityân-ı beyyine için istimhâl etmeğin mehl-i şer‘î ile imhâl olundukdan sonra ikrâr mertebesi olan meblağ-ı mezbûr elli esedî guruşu müdde‘î-i mezbûra edâ ve teslîme mezbûr Şaban Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mahmud Beşe b. Halil el-Mübâşir, Mehmed Bey b. Abdullah, İbrahim Çelebi b. Ahmed, Mustafa Çelebi b. Ahmed, Mehmed b. Ramazan.