Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 748 Hüküm no: 970 Orijinal metin no: [115b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Beşe b. Eyüb’ün, evini, ev eşyalarını ve tarlalarının tasarruf hakkını Osman Beşe b. Hasan’a devrettiği Fi’l-asl vilâyet-i Anadolu’da Bursa Yenişehri kazâsına tâbi‘ Çardak nâm karye ahâlîsinden olup dergâh-ı âlî -dâme merci‘an li’l-e‘âlî- yeniçerilerinin kırk dördüncü ağa bölüğü yoldaşlarına mahsûs oda ahâlîsinden Yahya Beşe b. Eyüb nâm kimesne tarafından husûs-ı âti’l-beyâna vekîl olup kazâ-i mezbûr kurâsından Papadya nâm karye ahâlîsinden Pîrî Beşe b. Hasan zikr olunan Yenişehir kasabası mahallâtından Kayserili mahallesi ahâlîsinden Şahin Beşe b. Abdullah nâm kimesneler şehâdetleri ile şer‘an vekâleti sâbite olan odabaşı Ahmed Beşe b. Mehmed nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda müvekkil-i mezbûr Yahya Beşe’nin hâl-i sıgārında vasîsi olan işbu bâ‘isü’l-kitâb Osman Beşe b. Mehmed mahzarında bi’l-vekâle ikrâr ve takrîr-i kelâm edip müvekkil-i mezbûr bey‘-i âti’z-zikrin sudûruna değin yedinde mülkü ve hakkı olup zikr olunan Çardak nâm karyede vâki‘ beyne’l-ahâlî ve’l-cîrân ma‘lûmü’l-hudûd bir çardak ve bir kebîr çatma anbar ve bir su kuyusu ve üç ahır ve bir fırın ve hadîkayı müştemil menzilini ve menzil-i mezkûr içinde mevcûde olup beynlerinde ma‘lûme olan eşyâmı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi safkatin vâhidetin on bir bin nakid râyic fi’l-vakt akçeye mezbûr Osman Beşe’ye bey‘ edip ol dahi iştirâ ve kabûl eyledikden sonra tefvîz-i âti’z-zikrin sudûruna değin hakk-ı müfevvazı olup taht-ı tasarrufunda olan yine zikr olunan Çardak nâm karye sınırında vâki‘ hudûd ve kıt‘a[sı] beynlerinde ma‘lûme kazâ-i mezbûr keyli ile tahmînen yedi [keyl] tohum isti‘âb eder tarlalarının hakk-ı tasarruflarını dahi sâhib-i arzları ma‘rifetiyle dört bin akçe bedel [ile] ferâğ ve tefvîz edip ol dahi tefevvuz ve kabûl eyledikden sonra semen-i mezbûr ile bedel-i mezkûr cem‘an on beş bin akçeyi tamâmen yedinden alıp kabz edip zikr olunan menzil ve eşyâyı mahallerinde kabza ve tarlaları tasarrufa mezbûr Osman Beşe’yi taslît eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî selhi şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Seyyid Mehmed Bey b. es-Seyyid Hüseyin, Mehmed Çelebi b. ( ), Kara Halil b. Mustafa Beşe, İbrahim Çelebi b. Ahmed, Baba Resul [b.] Rıdvan.