Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 347 Hüküm no: 228 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Yusuf’un, merhum kocası Mehmed Yazıcı b. Yunus’tan kendisine intikal eden hisseleri vasî Receb’den tahsil ettiği Mahmiye-i Galataˈya tâbi‘ kasaba-i Tophâne mahallâtında Tomtom mahallesi sükkânından olup bundan akdem vilâyet-i Rumeliˈnde İsmail Geçidi kasabasında ticâret üzere iken vefât eden Mehmed Yazıcı b. Yunus nâm kimesnenin verâseti zevce-i metrûkesi Ümmühani bt. Yusuf nâm hatun ile sulbî sagīr oğulları Abdullah ve Ahmedˈe münhasıra olup ba‘dehû mezbûr dahi müteveffâ olup verâseti vâlidesi merkūme Ümmühani Hatun ile li-ebeveyn er karındaşı merkūm Abdullahˈa münhasıra olup tashih-i mes’eleleri bi-hükmiˈl-münâsaha kırk sekiz sehimden i‘tibâr olunup sihâm-ı mezkûrede on üç sehmi mezbûre Ümmühani Hatunˈa ve otuz beş sehmi sagīr-i mezbûr Abdullahˈa isâbet eylediği şer‘an zâhir ve mütehakkık oldukdan sonra merkūme Ümmühani Hatun meclis-i şer‘-i hatîr-i lâzımüˈt-tevkīrde sagīrân-ı mezbûrânın tesviye-i umûrlarıçün kıbel-i şer‘den mansûb vasîleri olmağla müteveffâ-i merkūmun muhallefâtına vâzı‘üˈl-yed olan işbu bâ‘isüˈl-kitâb el-Hâc Receb b. ( ) nâm kimesne mahzarında ikrâr-ı tâm ve takrîr-i kelâm edip zevcim müteveffâ-yı mezbûrun muhallefâtı sâbıkā mahmiye-i mezbûrede kassâm-ı askerî olan Sinan Efendi tahrîr ve defter eyleyip beyneˈl-verese taksîm edip lâkin sehv olup kısmet-i âdile olmamak ile hâlâ muvakkı‘-ı sadr-ı sahîfe hâkim-i şer‘-i şerîfe huzûrunda mûmâ-ileyhin defterinde mevcûd nakid deyü mastûr zimem vesâir tereke-i menkūle ve mahalle-i mezbûrede vâki‘ içinde sâkine olduğumuz menzil ile menzil-i sagīr tekrar tahrîr ve defter olundukda ol cümleden düyûn verilip mesârif-i ma‘rûfe ihrâç olundukdan sonra mehr-i müeccel hakkım ve sahhaˈl-bâkīde ber-mûceb-i defter hisse-i makrûremi mezbûr el-Hâc Receb yedinden tamamen istifâ ettiğimden sonra mezbûr el-Hâc Receb zikrolunan İsmail Geçidi kazâsında cem‘ ve tahsîl edip getirdiği mâldan ve el-Hâc Mustafa İstanbulˈda cem‘ ettiği mâldan dahi hissemi tamamen alıp ba‘dehû müteveffâ-yı mezbûr oğlum Abdullahˈın minvâl-i meşrûh üzre hissesinde dahi ber-mûceb-i defter bana musâb kırk bir bin altı yüz akçe hissemi mezbûr el-Hâc Receb yedinden tamamen ahz ve istifâ eyledim ba‘deˈl-yevm müteveffiyân-ı mezbûrân muhallefâtlarında benim hisselerimden vasî-i mezbûr yedinde ve zimmetinde bir akçe ve bir habbe hakkım kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-âşir min-Cumâdelâhire li-sene erba‘a ve semânîn ve elf. Şuhûdüˈl-hâl: el-Hâc Mustafa b. ( ), el-Hâc Musa b. Hüseyin, el-Hâc Durmuş b. ( ), Fazlullah b. Ramazan, Cafer b. İbrahim, Üstâd Sinan b. Ali, Mehmed b. Mustafa, Mehmed b. Kadri, Hüseyin b. Ali