Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 355 Hüküm no: 236 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Çavuş b. Ferhad’ın, karısı İsmihan’dan başka varisi olmadığı, terekeden kalan evin dörtte üçünün beytülmal emini tarafından kendisine satıldığı Mahmiye-i Galataˈya tâbi‘ Kasaba-i Kasımpaşa mahallâtından Seferikoz mahallesinde sâkin iken bundan akdem vefât eden Mehmed Çavuş b. Ferhadˈın zevce-i metrûkesi İsmihan bt. İbrahimˈden gayrı zâhirde vâris-i ma‘rûfu olmamağla muhallefâtının rub‘ı mezbûre İsmihanˈa ve sülüs-ı erbâ‘ı cânib-i beytü’l-mâle âyid ve râci‘ olduğu zâhir ve müte‘ayyin oldukdan sonra mahmiye-i mezbûrede emîn-i beytü’l-mâl olan Mehmed Bey b. Ali el-cündî mahfil-i kazâda işbu râfi‘atüˈl-kitâb mezbûre İsmihan mahzarında ikrâr ve takrîr-i kelâm edip muhallefât-ı müteveffâ-yı mezbûrdan mahalle-i mezbûrede vâki‘ bir tarafı Mustafa Kapudan mülkü ve bir tarafı imâma meşrûta menzil ve bir tarafı tarîk-i hâs ve bir tarafı tarîk-i âm ile mahdûd iki bâb fevkānî oda ve iki bâb tahtânî oda ve bir sofa ve bi’r-i mâ’ı ve kenîfi ve eşcâr-ı müsmire ve gayr-ı müsmireyi müştemil menzilin vech-i mahkî üzre sülüs-ı erbâ‘ı izn-i şer‘le bey‘a arz olundukda sûk-ı sultânîde kirâren ve mirâren müzâyede olunup ragabât-ı nâs biˈl-külliye münkatı‘a oldukdan sonra cümle menzil-i mezkûr on altı bin akçeden mezbûre İsmihan üzerinde karâr edip ziyâde ile tâlib-i âharı zuhûr etmemeğin meblağ-ı mezbûrdan rub‘ hissesi olan dört bin akçeden mâ‘adâ ber-vech-i muharrer sülüs-ı erbâ‘ını mezbûre İsmihanˈa on iki bin akçeye bey‘ ve teslîm ol dahi minvâl-i muharrer üzre iştirâ ve tesellüm eyledikden sonra meblağ-ı mezbûr on iki bin akçeden mezbûre İsmihanˈın beş bin akçe mehr-i müecceline takās olunup meblağ-ı bâkī yedi bin akçeyi mezbûre İsmihan yedinden biˈt-tamam alıp kabz eyledim ba‘deˈl-yevm menzil-i mahdûd-ı mezkûr mezbûre İsmihanˈın mülk-i müşterâsıdır keyfe mâ yeşâ ve tahtâr mutasarrıfe olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Hurrire fiˈl-yevmiˈs-sânî-i aşer min-Cumâdelâhire li-sene erba‘a ve semânîn ve elf. Şuhûdüˈl-hâl: Hüseyin Efendi b. Ali el-imâm, el-Hâc Mehmed b. Şeyh Mehmed el-müezzin, Ebûbekir b. Ömer el-cündî, İbrahim Çelebi b. Abdüllatif, Ali Bey el-cündî, Mustafa Kapudan b. Abdullah, Mehmed b. İlyas, İlyas b. Ramazan, Çukadar Osman Beşe ve gayr-ı mineˈl-hâzırîn