Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 359 Hüküm no: 240 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. İbrahim’in, merhum kocası Mehmed Çavuş b. Ferhad zimmetindeki mehir alacağını terekeye el koyan beytülmal emininden talep ettiği Mahmiye-i Galataˈya tâbi‘ Kasımpaşa mahallesinde Seferikoz mahallesinde sâkine iken bundan akdem vefât eden Mehmed Çavuş b. Ferhadˈın zevce-i metrûkesi İsmihan bt. İbrahimˈden gayrı zâhirde vâris-i ma‘rûfu olmayıp muhallefâtının rub‘ı mezbûre İsmihanˈa ve sülüs-ı erbâ‘ı cânib-i beytü’l-mâle â’id ve râci‘ olduğu şer‘an zâhir ve müte‘ayyin oldukdan sonra mezbûre İsmihan meclis-i şer‘-i hatîr-i lâzımüˈt-tevkīrde biˈl-fi‘il mahmiye-i mezbûrede emîn-i beytü’l-mâl olmağla müteveffâ-yı mezbûrun muhallefâtına vâzı‘üˈl-yed olan Mehmed Bey b. Ali mahzarında üzerine da‘vâ ve takrîr-i kelâm edip müteveffâ-yı mezbûr Mehmed Çavuşˈa hâl-i sıhhatinde kendi nefsimi beş bin akçe mehr-i müeccel üzerine tezvîc ol dahi vech-i muharrer üzre tezevvüc ve kabûl edip kableˈl-istifâ fevt olup zimmetinde kalmağın tereke-i vâfiyesinden vermek üzre emîn-i mezbûrdan taleb ederim suâl olunsun dedikde gıbbeˈs-suâl ve akībeˈl-inkâr müdde‘iyye-i mezbûreden da‘vâsına mübeyyine beyyine taleb olundukda udûl-ı Müslimînˈden mahalle-i mezbûre imâmı Hüseyin Efendi b. Ali ve el-Hâc Mehmed el-müezzin nâm kimesneler li-ecliˈş-şehâde meclis-i şer‘a hâzırân olup isreˈl-istişhâdiˈş-şer‘î fiˈl-vâki‘ müdde‘iyye-i mezbûre İsmihan bizim huzûrumuzda nefsini müteveffâ-yı mezbûr Mehmed Çavuşˈa beş bin akçe [mehr-i] müeccel üzerine tezvîc ol dahi vech-i muharrer üzere tezevvüc ve kabûl etti biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘deˈt-ta‘dîl veˈt-tezkiye şehâdetleri makbûle oldukdan sonra meblağ-ı mezbûr beş bin akçe mehr-i müeccelini küllen ve ba‘zan ahz veyâ hîbe ve âhara havâle ve turûk-ı şer‘iyeden bir tarîk ile müteveffâ-yı mezbûr Mehmed Çavuşˈun zimmetini ibrâ etmediğine mezbûre İsmihanˈa yemîn teklîf olundukda ol dahialâ-vefkiˈl-mesûl yemîn billâhiˈl-aliyyüˈl-a‘lâ etmeğin mûcebiyle emîn-i mezbûra tenbîh birle mâ vaka‘a biˈt-taleb ketb olundu. Hurrire fiˈl-yevmiˈs-sâmin-i aşer min-Cumâdelâhire li-sene erba‘a ve semânîn ve elf. Şuhûdüˈl-hâl: Ebûbekir b. Ömer el-cündî, İbrahim Çelebi b. Lütfullah, Ali Bey el-cündî, Mehmed b. İlyas, İlyas b. Ramazan, Mustafa Kapudan b. Abdullah