Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 373 Hüküm no: 251 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe’nin evinin yarısını, Havva Hatun’a sattığı Mahrûse-i Galata a‘mâlinden kasaba-i Tophâneˈde Firuzağa mahallesi sâkinelerinden fahrüˈl-muhadderât Âişe bt. ( ) nâm hatun meclis-i şer‘-i hatîr-i lâzımüˈt-tevkīrde yine mahalle-i mezbûre sâkinelerinden Havva bt. Abdullah nâm hatun tarafından husûs-ı âtiˈl-beyâna vekîl olup vekâleti nehc-i şer‘î üzere sâbite olan bâ‘is-i hâzeˈl-kitâb ikisi Mustafa Çelebi mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Cafer Ağa veresesi mülklerine ve bir tarafı merhûm Mehmed Ağa veresesi mülklerine ve bir tarafı dahi merhûm Siyavuş Paşa bağçesine ve bir taraf-ı râbi‘i tarîk-i âmma müntehî fevkānî ve tahtânî büyût-ı adîdeyi müştemil menzilimin bi-cümletiˈt-tevâbi‘ nısf-ı şâyi‘ini on sekiz bin nakd-i râyic fiˈl-vakt akçeye mezkûre Havva Hatun tarafından îcâb ve kabûlü hâvî bey‘-ı bâtt-ı kat‘î ile bey‘ edip ol dahi vech-i meşrûh iştirâ ve kabûl eylediğinden sonra semeni olan meblağ-ı mezbûr on sekiz bin akçeyi müşteriye-i merkūme Havva yedinden tamamen ahz u kabz eyledim ba‘deˈl-yevm menzil-i mahdûd-ı mezbûrun nısf-ı şâyi‘-i mezkûru merkūme Havvaˈnın mülk-i müşterâsıdır [58a] keyfe mâ yeşâ mutasarrıfe olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈt-tâsi‘ veˈl-işrîn min-Cumâdelâhire li-sene erba‘a ve semânîn ve elf. Şuhûdüˈl-hâl: Mâ-sebak