Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 390 Hüküm no: 261 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varislerin, merhum Ahmed b. Receb Bey’in terekesinden kendilerine intikal eden çiftlik binasına ait hisseleri, küçük çocuklar Mustafa ve Fatma için vasîleri Ahmed Beşe’ye sattıkları Medîne-i Hazret-i Eyyûb mahallâtından Câmi‘-i Kebîr mahallesinde sâkine iken bundan akdem vefât eden Ahmed b. Receb Bey nâm kimesnenin verâseti anası Gevher bt. Abdullahˈa ve li-eb er karındaşı Mehmed Çelebi ile Ümmühani ve İsmihan nâm hatunlara ve li-üm er karındaşı Mustafa ve li-üm kız karındaşı Fatma sagīrlere münhasıra ve tashih-i meseleleri yirmi dört sehimden i‘tibâr olunup sihâm-ı mezbûreden dört sehim anası mezbûre Gevherˈe ve altı sehim li-eb er karındaşı merkūm Mehmed Çelebi ile üçer sehmi mezbûretân Ümmühan ve İsmihanˈdan her birine ve dörder sehmi li-üm karındaşları sagīrân-ı mezbûrân Mustafa ve Fatmaˈya isâbet ettiği şer‘an zâhir ve müte‘ayyin oldukdan sonra merkūmân Mustafa ve Fatma nâm sagīrlerin vâlideleri ve kıbel-i şer‘den mansûb vasîleri olan mezbûre Gevherˈin zevci ve tarafından zikr-i âtî husûsa vekîli olup mezbûrenin zâtını ma‘rifet-i şer‘iye ile ârifân olan Şa‘bân Efendi b. Süleyman el-kādî ve Mehmed Çelebi b. Receb şehâdetleri şer‘an vekâlet-i sâbite olan Mehmed Çelebi b. Bayram vekâleten ve merkūme Ümmühani ve Mehmed Çelebi asâleten merkūme İsmihanˈın dahi zevci ve zikri câ’î husûsa vekîl olup yine şâhidân-ı mezbûrân şehâdetleriyle şer‘an vekâleti sâbite olan Ramazan Bey b. Ali ve vekâleten meclis-i şer‘de işbu râfi‘üˈr-rakīm Ahmed Beşe b. Abdullah mahzarında ikrâr ve takrîr-i kelâm edip müteveffâ-yı mezbûrun babası olup kendiden mukaddem vefât eden mezbûr Receb Bey vefât ettikde terekesinden yine medîne-i mezbûreye tâbi‘ Kağıdhâneköy demekle şehîr karyede vâki‘ bir tarafdan Arabzâde Abdülbaki Çelebi mülküne ve üç [61b] tarafdan tarîk-i âmma münhetî üç fevkānî oda ve altında ahır ve bir anbârı ve bir koyun mandırası ve üç dolab kuyusu ve üç dönüm mikdârı bağçeyi ve iki bi’r-i mâ’ı ve bir fırını müştemil arsasının sene yüz akçe Sultân Bâyezid Vakfıˈna mukâta‘ası olup çiftlik ta‘bîr olunur binâsı mülk menzil yetmiş iki sehimden olup sihâm-ı mezbûrenin on dört sehim oğlu mûrisimiz müteveffâ-yı mezbûra ba‘dehû intikāl ve isâbet ve ileˈl-vefât taht-ı tasarrufunda mülkü olup hâlâ vefât etmekle cümlemize biˈl-ırsiˈş-şer‘î intikāl ve yirmi dört sehme münkasım olup hâlâ cümlemiz hisselerimizi âhara bey‘ murâd etmekle sagīrân-ı mezbûrânın hisseleri ifrâz mümkün olmayıp bey‘ ve semenleri a‘mâl-i sagīrân-ı mezbûrânın haklarında evlâ olmağın her birimiz vech-i muharrer üzre hisselerimizi ve sagīrân-ı mezbûrânın hisselerini asâleten ve vesâyeten ve vekâleten merkūm Ahmed Beşeˈye altı bin akçeye tarafeynden îcâb ve kabûlü hâvî ve bey‘-ı bâtt-ı sahîh-i şer‘î ile bey‘ ve teslîm ol dahi ba‘deˈl-iştirâ veˈt-tesellüm semeni olan meblağ-ı mezbûr altı bin akçeyi her birimiz bi-kadriˈl-hısas merkūm Ahmed Beşe yedinden biˈt-tamam ahz u kabz eyledik min-ba‘d mülk-i müşterâsıdır haysü mâ yeşâ mutasarrıf olsun dediklerinde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈl-hâmis min-şehri Recebiˈl-ferd li-sene erba‘a ve semânîn ve elf. Şuhûdüˈl-hâl: Fahrüˈl-eşbâh Hasan Ağa b. Ahmed Sarrâc-ı hâssa, Ali Ağa b. İbrahim Korucubaşı, Şa‘bân Efendi b. Süleyman, Veli Beşe b. Mahmud, Ali Bey