Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 395 Hüküm no: 265 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çorbacı b. Receb’in varislere intikal eden mülk evin, Mehmed b. Sinan’a satıldığı Medîne-i Hazret-i Ebâ Eyyûbeˈl-Ensârî mahallâtından Ahmed Dede mahallesinde sâkine iken bundan akdem vefât eden İbrahim Çorbacı b. Recebˈin zevceteyn-i metrûketeyn Abdurrahime bt. Receb ve Emine bt. Abdullah sulbî sagīr oğulları Mehmed ve Ahmedˈe münhasıra olup kableˈl-kısme mezbûr Mehmed dahi vefât edip verâseti vâlidesi merkūme Emine ile li-ebeveyn er karındaşı merkūm Mehmedˈe münhasıra olduğu şer‘an zâhir ve müte‘ayyin oldukdan sonra mezkûre Emine meclis-i şer‘de işbu râfi‘üˈl-vesîka mezbûr Mehmed b. Sinan mahzarında ikrâr ve takrîr-i kelâm edip müteveffâ-yı evvel mezbûr İbrahim Çorbacıˈnın ileˈl-vefât taht-ı tasarrufunda mülkü ve hakkı olup ba‘de vefâtihî on yedi bin akçeye takvîm olunan mahalle-i mezbûrede vâki‘ bir tarafdan mezbûre Abdurrahime Hatun mülküne ve bir tarafdan mahalle-i mezbûre müezzinine meşrûta olan vakf menzile ve bir taraftan Küçük Ali Çelebi mülküne ve bir tarafdan yine medîne-i mezbûrede Musa Çavuş Mescid-i Şerîfi müezzinine meşrûta olan vakıf menzile müntehî iki bâb tahtânî ve iki fevkānî odaları ve bi’r-i mâ’î ve bahçeyi müştemil mülk menzilden tafsîli mürûr eden hisse-i şer‘iyelerimi mezbûr Mehmed b. Sinanˈa altı bin üç yüz elli yedi akçeye bi-safkatin vâhidetin tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr altı bin üç yüz elli yedi akçeyi merkūm Mehmed b. Sinanˈın mülk-i müşterâsıdır hasbemâ yeşâˈ mutasarrıf olsun dedikde gıbbeˈt-tasdîkiˈş-şer‘î mâ vâka‘a biˈt-taleb ketb olundu. Fiˈl-yevmiˈl-âşir min-Recebiˈl-ferd li-sene [10]84. Şuhûdüˈl-hâl: Hasan Efendi b. Ramazan, İbrahim Çelebi b. Mehmed, Ahmed Çelebi b. Mehmed, Osman Beşe b. Veli, Hüseyin Çelebi b. Ali