Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 410 Hüküm no: 274 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. MerhumAli Reis b. Ahmed’in terekesinden çocuklarına kalan ev hissesinin borçların ödenmesi için vasî tarafından anneleri Ayşe bt. Abdullah’a satıldığı Mahrûse-i Galata a‘mâlinden kasaba-i Tophâneˈde Cihangir mahallesi sükkânından olup bundan akdem Azak nâm mahâlde vefât eden Ali Reis b. Ahmedˈin evlâd-ı sıgārına vasî-i muhtârı olan el-Hâc Beşir b. İsmail meclis-i şer‘-i hatîrde müteveffâ-yı mezbûrun zevce-i metrûkesi râfi‘a-i hâzeˈl-kitâb Âişe bt. Abdullah nâm hatun mahzarında biˈl-vesâye ikrâr-ı tâm ve takrîr-i kelâm edip müteveffâ-yı mezbûr Ali Reisˈin düyûn-ı kesîre-i müsbetesi olmağla cümle muhallefâtından olup zarûret-i deyni içün mahkûm biˈl-bey‘ olan mahalle-i mezbûrede vâki‘ bir tarafı el-Hâc Ali mülkü ve iki tarafı vasîsi olduğum sıgār-ı mezbûrîn mülkleri ve taraf-ı râbi‘i tarîk-i âmma müntehî bir bâb-ı süflî ve kenîfi müştemil menzilini mezbûre Âişe Hatun tarafeynden îcâb ve kabûlü hâvî bey‘-ı bâtt-ı kat‘î ile yirmi iki bin yüz elli sekiz akçeye vesâyet-i mahkiyem hasebiyle bey‘ ve teslîm ol dahi menzil-i mahdûd-ı mezbûru vech-i meşrûh üzere iştirâ ve tesellüm ve kabûl eyledi min-ba‘d menzil-i mahdûd-ı mezkûr müşteri-i mezbûre Âişeˈnin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıfa olsun dedikde gıbbeˈt-tasdîk mâ vaka‘a biˈt-taleb ketb olundu. Fiˈl-yevmiˈl-hâmis veˈl-işrîn min-şehri Cemâziyelâhir li-sene erba‘a ve semânîn ve elf. Şuhûdüˈl-hâl: Veli Reis b. Mehmed, el-Hâc Hüseyin b. Abdülkerim, el-Hâc Veli b. Ramazan, el-Hâc Ali b. ( ) ve gayruhum