Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 410 Hüküm no: 273 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ayşe’nin terekesinden beytülmala kalan ev hissesinin kocası Receb Beşe b. Mustafa’ya satıldığı Mahrûse-i Galata a‘mâlinden kasaba-i Kasımpaşaˈda Küçük Piyalepaşa mahallesi sâkinlerinden iken bundan akdem kat‘iyle vefât eden Âişe nâm hatunun zevci Receb Beşe b. Mustafaˈdan gayri zâhirde vâris-i ma‘rûfu olmamak ile muhallefâtının nısfı mezbûr Receb Beşeˈye ve nısf-ı âharı dahibeytü’l-mâle âyid olduğu bi-hasebiˈş-şer‘ müte‘ayyine oldukdan sonra mahrûse-i mezbûrede biˈl-fi‘il emîn-i beytü’l-mâl olan fahrüˈl-akrân Mehmed Ağa b. Ali meclis-i şer‘-i hatîr-i lâzımüˈt-tevkīrde mezkûr Receb Beşe mahzarında biˈl-emâne ikrâr ve takrîr-i kelâm edip müteveffiye-i mezbûre Âişeˈnin muhallefâtından olup mahalle-i mezbûrede vâki‘ etrâf-ı selâsesi es-Seyyid Mustafa ve es-Seyyid Ömer ve Şerife Fatma nâm karındaşlar mülklerine ve taraf-ı râbi‘i tarîk-i âmma müntehî bir bâb tahtânî oda ve önünde sofayı ve bir su kuyusunu ve kenîfi ve cüneyneyi müştemil menzilinin biˈl-emâne zikri sebk eylediği vech üzre nısfı zevc-i mezbûr Receb Beşe ve nısf-ı âharı dahibeytü’l-mâle âide olmuş idi el-hâletü hâzihî menzil-i mahdûd-ı mezbûrun beytü’l-mâle âid olan nısf-ı şâyi‘-i âharını bi-cümletiˈt-tevâbi‘i veˈl-levâhık ve kâffetiˈl-merâfık emânet-i mahkiyem hasebiyle mezbûr Receb Beşeˈye dört bin akçeye bey‘ ve teslîm ol dahi vech-i meşrûh üzere iştirâ ve tesellüm eylediğinden sonra semeni olan meblağ-ı merkūm dört bin akçeyi yedinden biˈt-tamam ahz u kabz eyledim ba‘deˈl-yevm menzil-i mezkûrun nısfı ırsen ve nısf-ı âharı dahi şirâen mezbûr Receb Beşeˈnin mülk-i mahzı ve hakk-ı sırfıdır dedikde gıbbeˈt-tasdîkiˈl-vicâhî mâ vaka‘a biˈt-taleb ketb olundu. Fî-evâsıtı şehri Recebiˈl-mürecceb li-sene erba‘a ve semânîn ve elf. Şuhûdüˈl-hâl: Ömer Efendi b. Veli, Mustafa b. Ahmed, Ahmed Beşe b. Mustafa, Abdülkerim b. Seydi Ali, Hüseyin b. Mehmed Odabaşı