Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 753 Hüküm no: 977 Orijinal metin no: [116b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed b. el-Hâc Veli’nin, Erzurum’dan aldığı ipek konusunda şahitlerin beyanı Mahmiye-i İstanbul’da Mi‘mâr Kemal mahallesi sükkânından kavukçu Ali Çelebi b. Hasan ve Kaliçeci el-Hâc Hasan mahallesi sükkânından kavukçu el-Hâc Yusuf b. Abdullah ve Suhte Sinan mahallesi sükkânından Muharrem b. Abdullah ve bâzirgân tâifesinden Mahmud Beşe b. Molla Ali nâm kimesneler meclis-i şer‘-i şerîf-i Ahmedî ve mahfil-i dîn-i münîf-i Muhammedî’de râfi‘ayi’l-kitâb Amasyalı Mustafa Ağa b. İbrahim ve dergâh-ı âlî çavuşlarından Mehmed Ağa b. İbrahim nâm kimesneler mahzarlarında her biri takrîr-i kelâm edip zikr olunan el-Hâc Hasan mahallesi ahâlîsinden olup hâlâ medîne-i Edirne’de olan dergâh-ı âlî solaklarından el-Hâc Mehmed b. el-Hâc Veli nâm kimesne bin yüz esedî guruşunu medîne-i Erzurum’dan ipek alıp mahmiye-i mezbûreye getirip bey‘ edip fâidesinin nısfı kendinin ve nısf-ı âharı dahi medîne-i mezbûrdan mahmiye-i mezbûreye gelirken esnâ-i tarîkde Tozanlı Deresi nâm mevzi‘de vefât edip terekesi mahrûse-i Tokat’da veresesi yedinde olduğu mesmû‘amız olan Kaputçuoğlu demekle ma‘rûf Ömer Çelebi nâm kimesneye târih-i kitâb senesi Cumâdelâhiresi’nde mahmiye-i mezbûrede bizim huzûrumuzda teslîm edip mezbûr Ömer Çelebi dahi meblağ-ı mezbûru merkūm Solak el-Hâc Mehmed yedinden vech-i muharrer üzre ipek alıp bey‘ etmek için ahz u kabz ettiğine bizim her birimiz şâhid olup vech-i muharrer üzre olan şehâdetleri her birimiz mezbûrân Mustafa Ağa ve Mehmed Ağa’dan her birimize tahmîl eyledik dediklerinde mezbûrân Mustafa Ağa ve Mehmed Ağa’dan her biri dahi şâhid-i asl olan mezbûrûn Ali Çelebi ve Hacı Yusuf ve Muharrem Çelebi ve bâzirgân Mahmud’dan her birinin vech-i muharrer üzre olan şehâdetleri meclis-i mezbûrda tahammül edip mahallinde şehâde ale’ş-şehâde tarîki üzre edâ-i şehâdete ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Ali Beşe b. Abdullah, Mehmed b. ( ), fahrü’l-akrân Eyüb Ağa Kethüdâ-yı Hazret-i Efendi, Hasan Beşe Çukadâr.