Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 443 Hüküm no: 290 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın, merhum Bali Bey b. Behram’dan natrun bahasından alacaklı olduğu Tüccâr-ı zeviˈl-iktidârdan işbu bâ‘isüˈl-vesîka el-Hâc Mustafa b. Abdullah meclis-i şer‘-i hatîrde medîne-i Hazret-i Ebâ Eyyûbˈde Kiremitçi Süleyman mahallesinde sâkin iken bundan akdem vefât eden Bali Bey b. Behramˈın verâseti zevce-i metrûkesi Canfeda bt. Abdullah ile sulbî sagīr oğlu Aliˈye ve mezbûre Canfedaˈnın batnında hâsıl-ı hamle münhasıra olduğu şer‘an zâhir ve müte‘ayyin oldukdan sonra haml-i mezkûr ile sagīr-i mezbûrun kıbel-i şer‘den mansûb vasîleri olup tereke-i müteveffâ-yı mezbûre biˈl-vesâye vâzi‘uˈl-yed olan Rıdvan Beşe b. Abdullah mahzarında üzerine da‘vâ ve takrîr-i kelâm edip müteveffâ-yı mezbûrun zimmetinde yedimden müşterâ ve makbûz vakıyyesi beynimizde ilm-i şer‘î ile ma‘lûm natrun bahâsından ba‘de küllî hesâb yüz beş bin üç yüz akçe hakkım olup kableˈl-istifâ fevt olmağla hâl-i hayatında meblağ-ı mezbûr yüz beş bin üç yüz akçe bana deyni olduğunu alâ-ruûsiˈl-işhâd dahi etmekle hâlâ vasî-i merkūmdan taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînˈden Esad Çelebi b. Mesud Efendi ve es-Seyyid Yusuf Çelebi b. es-Seyyid Halil li-ecliˈş-şehâde meclis-i şer‘a hâzırân olup isreˈl-işhâdiˈş-şer‘î fiˈl-hakīka müteveffâ-yı mezbûr hayatında müdde‘î-i mezbûr el-Hâc Mustafa Beyˈe ba‘de küllî hesâb natrun bahâsından yüz beş bin akçe zimmetimdedir deynim vardır deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle hüküm birle mâ-vaka‘a biˈt-taleb ketb olundu. Fiˈl-âşir min-şehri Recebiˈl-ferd li-sene erba‘a ve semânîn ve elf. Şuhûdüˈl-hâl: es-Seyyid Mehmed Efendi b. Abdüssettar el-imâm, el-Hâc İbrahim Kapudan b. Abdülmennan, el-Hâc Ahmed Çelebi b. Nasuh, es-Seyyid Ali Çelebi b. eş-Şeyh Mehmed Efendi, el-Hâc Mehmed Beşe b. Hüsrev, el-Hâc Mehmed b. el-Hâc Ali, Mehmed Beşe b. el-Hâc Ali, Mahmud Beşe b. Ali