Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 755 Hüküm no: 979 Orijinal metin no: [116b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Şeyh Mahmud’un, Mehmed b. Ebûbekir Bey’deki alacağını sulh yoluyla tahsil ettiği Vilâyet-i Anadolu’da Bolu sancağında Bucurva? kazâsına tâbi‘ Şeyhfaysi? nâm karye ahâlîsinden Hüseyin b. Şeyh Mahmud nâm kimesne meclis-i şer‘-i şerîf-i lâzımü’t-teşrîfde bâ‘isü’l-kitâb Mehmed b. Ebûbekir Bey nâm kimesne mahzarında ikrâr ve takrîr-i kelâm edip mezbûr Mehmed zimmetinde yedimden müşterâ ve makbûz bir katır semeninden hakkım olan otuz guruş ve on üç zirâ‘ bez semeninden hakkım olan on [guruş] semen ve cihet-i karzdan hakkım olan on üç [guruş] semen ve ödünç verdiğim dokuz keyl arpanın mislini mezbûr Mehmed’den taleb eylediğimde mezbûr Mehmed ba‘zını ikrâr ve ba‘zını inkâr etmekle beynimizde nizâ‘-ı küllî vâki‘ olmağın muslihûn tavassut edip mezbûr Mehmed ile beynimizde on esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûru merkūm Mehmed yedinden tamâmen ahz u kabz edip husûs-ı mezbûra ve târih-i kitâba gelinceye beynimizde cârî olan ahz ve i‘tâya müte‘allika âmme-i hukūk-ı ma‘lûme ve mechûle da‘vâsından mezbûr Mehmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min [şehri] Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Çavuş b. Kenan, Hasan Bey b. Ebûbekir, Resul Ağa b. Hacı Ahmed, el-Hâc Ali b. Şah, Mehmed Çavuş b. Osman, Şaban Çavuş.