Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 755 Hüküm no: 980 Orijinal metin no: [116b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Seme’nin, ölen muhzırbaşı Mahmud Ağa’daki alacağını vârislerden sulh yoluyla tahsil ettiği Mahmiye-i İstanbul’da Cebealikapısı hâricinde sâkin Kirüz cemâ‘atinden Aslan v. Seme nâm Yahudi meclis-i şer‘-i şerîfde mahmiye-i mezbûrda Hobyar mahallesinde sâkin iken bundan akdem vefât eden muhzırbaşı Mahmud Ağa’nın hasren vârisleri olup tereke-i vâfiyesine vâzı‘ateyi’l-yed olan zevce-i metrûkesi Âişe bt. Abdullah ile sulbiye kebîre kızı Rukiye nâm hâtunlar taraflarından husûs-ı âti’l-beyâna vekîl olduğu mezbûretânın zâtlarını ma‘rifet-i şer‘iyye ile ârifân Mehmed Ağa b. Mustafa ve Mehmed Bey b. Derviş nâm kimesneler şehâdetleriyle şer‘an sâbit olup mezbûre Rukiye’nin zevci olan Hasan Çelebi b. Abdülmennân nâm kimesne mahzarında ikrâr ve takrîr-i kelâm edip müteveffâ-yı mezbûr zimmetinde çuka ve kumaş ve kadife bahâlarından hakkım olan bin üç yüz otuz esedî guruşu bundan akdem müvekkiletân-ı mezbûretândan taleb ve da‘vâ ettiğimde ba‘de’n-nizâ‘ muslihûn tavassut edip müvekkiletân-ı mezbûretân ile beynimizde sekiz yüz esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr sekiz yüz esedî guruşu müvekkiletân-ı mezbûretân yedlerinden ahz u kabz edip husûs-ı mezbûra müte‘allika da‘vâdan müvekkiletân-ı mezbûretânı ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Sinan Çelebi b. Mehmed Bey, Hacı Mehmed b. Mustafa, Mehmed Ağa b. Derviş, İbrahim Çelebi b. Halil, Yusuf Bey b. Abdullah, Mehmed Çelebi b. Mustafa, Mehmed Bey b. Bayezid.