Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 463 Hüküm no: 307 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Receb Reis’ten küçük çocuğuna intikal eden gemi ve aletlerinin borçların ödenmesi için vasî tarafından Mehmed Beşe’ye satıldığı Mahmiye-i Galataˈya tâbi‘ kasaba-i Tophâneˈde Hoca Ali mahallesinde sâkine iken bundan akdem vefât eden Receb Reisˈin evlâd-ı sıgārının tesviye-i umûrları’çün kıbel-i şer‘den mansûb vasîleri olan Bayram Beşe b. İlyas nâm kimesne mahfil-i kazâda işbu bâ‘isüˈl-kitâb Mehmed Beşe b. Ahmed nâm kimesne mahzarında ikrâr ve takrîr-i kelâm edip müteveffâ-yı mezbûrun düyûn-ı kesîresi olmağla muhallefâtından Kürkçükapısıˈnda merbût örf-i mellâhînde Zarbuna ta‘bîr olunur on altı zirâ‘ sefînenin nısfı mukaddemâ izn-i şer‘le bey‘a arz olunup sûk-ı sultânîde kirâren ve mirâren nidâ ve müzâyede olunup ragabât-ı nâs münkatı‘a oldukdan sonra mezbûr Mehmed Beşe üzerinde yüz kırk kıt‘a esedî [73b] guruşda karâr edip ziyâde tâlib-i âhar zuhûr etmemeğin vesâyetim hasebiyle zikrolunan nısf sefîneyi içinde mevcûd âlât-ı lâzımesinden dört demir ve dört komane ve yelkenleri ve kazgan ve sandal vesâir âlâtın nısfı meblağ-ı mezbûr yüz kırk guruşa mezbûr Mehmed Beşeˈye bâtten bey‘ ve teslîm edip ol dahi minvâl-i muharrer üzre iştirâ ve tesellüm eylediğinden sonra semeni olan meblağ-ı mezbûru yedinden tamamen alıp kabz eyledim ba‘deˈl-yevm zikrolunan nısf sefîne ve nısf âlât-ı mezkûrda müşteri-i mezbûrun mülküdür keyfe mâ yeşâ mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-işrîn min-Şaʻbâniˈl-mu‘azzam li-sene erba‘a ve semânîn ve elf. Şuhûdüˈl-hâl: Mehmed Beşe b. Süleyman, Mahmud Beşe b. Durmuş, Şükür Beşe b. Mehmed, Osman Beşe b. Mehmed, el-Hâc Mustafa el-münâdî, İsa Beşe, Hüseyin b. Ali