Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 478 Hüküm no: 316 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Vardiyanbaşı Mustafa Kapudan b. Ali’den intikal eden terekenin, varisler arasında paylaşımında kendisine haksızlık edildiğini iddia eden kardeşi Fatma Hatun’un davasında haksız olduğu Mahmiye-i Galata a‘mâlinden kasaba-i Kasımpaşaˈda Yahya Kethudâ mahallesi ahâlîsinden olup işbu sene-i mübârekede Hâcc-ı şerîfˈde vefât eden Vardiyanbaşı Mustafa Kapudan b. Aliˈnin verâseti zevce-i metrûkesi Havva Hatun bt. Ahmed Kethudâ ile sulbiye kebîre kızı Naimeˈye ve li-ebeveyn kız karındaşı Fatmaˈya münhasıra ve tashîh-i meseleleri seksen sehimden i‘tibâr olunup sihâm-ı mezbûreden bir sehmi zevcesi merkūme Havva Hatunˈa ve dört sehmi kızı mezkûre Naimeˈye ve üç sehmi kız karındaşı mersûme Fatmaˈya isâbet ettiği şer‘an zâhir ve müte‘ayyin oldukdan sonra mezbûre Fatma Hatun tarafından husûs-ı âtiˈl-beyâna vekîl olup merkūmenin zâtını ma‘rifet-i şer‘iye ile ârifân olan Ahmed Bey b. İbrahim [ve] Çavuş b. Şa‘bân şehâdetleriyle şer‘an vekâleti sâbite olan Ahmed b. Şa‘bân nâm râcil meclis-i şer‘-i hatîr-i vâcibüˈt-ta‘zîmde müteveffâ-yı mezbûrun terekesine vâzi‘atüˈl-yed olan işbu bâ‘isetüˈl-kitâb mezkûretân Havva ve Naime hatunlar taraflarından kezâlik zikri câ’î husûsa vekîlleri olup merkūmânın zâtlarını ma‘rifet-i şer‘iye ile ârifân olan Mehmed Efendi b. Ahmed el-imâm ve el-Hâc İbrahim b. Mehmed şehâdetleriyle şer‘an vekâleti sâbite olan zahrüˈl-eşbâh Ahmed Ağa b. Mustafa mahzarında biˈl-vekâle üzerine da‘vâ ve takrîr-i kelâm edip bundan akdem müteveffâ-yı mezbûrun terekesinden müvekkiletân-ı mezbûretân Havva ve Naime Hatun yüz aded şerîfî altın her biri ikişer yüz yetmişer akçeden yirmi yedi bin akçe nakid ile iki yüz kırk esedî guruşa olmak üzere altı nefer esirler bedelinden bi-hesâb-ı hurde yirmi sekiz [76a] bin sekiz yüz akçe ve kırk üç bin yedi yüz seksen tereke bahâsından min-haysüˈl-mecmû‘ doksan dokuz bin beş yüz seksen akçeyi kabz ettiklerinden sonra meblağ-ı mezbûrun bin akçesi mukaddemâ kasaba-i mezbûre nâibinden mezbûretân Havva ve Naime ve merkūme Fatma içün alınan hüccet-i şer‘iyenin harcına ve tereke dellâliyesine ve ser-bölüğe ve ücret-i dükkânına ve hammâliye ve ta‘âmiyesine bin yedi yüz seksen akçe ki cem‘an iki bin yedi yüz seksen akçesi ihrâç olundukdan sonra bâkī kalan doksan altı bin sekiz yüz akçeden müvekkilem mezbûre Fatmaˈnın üç sehm hissesine isâbet eden otuz altı bin üç yüz akçeyi müvekkilem içün biˈl-vekâle müvekkiletân-ı mezbûretân[dan] taleb ederim vekîl-i mezbûra suâl olunsun dedikde gıbbeˈs-suâl vekîl-i merkūm Ahmed Ağa cevâbında fiˈl-vâki‘ müvekkilelerim merkūmetân Havva ve Naime müvekkile-i mezkûre Fatma huzûrunda nâib-i mezbûr akd-i meclis edip her biri âharın rızâlarıyla müteveffâ-yı merkūmun tereke-i mezkûresini beynlerinde iktisâm murâd eylediklerinde evvelâ mezbûre Havva yirmi beş bin akçe mehr-i müeccelinin on bin akçesini ve mukaddemâ müteveffâ-yı merkūme ikrâz ve teslîm ettiği on bin akçeyi ve müteveffâ-yı mezbûr Hacˈdan geldikde mu‘tâd üzre harc olunan dört bin sekiz yüz akçe ve vefâtı haberi geldikde üçünde ve yedisinde ve kırkında ve senesinde tabh-ı ta‘âm içün dört bin sekiz yüz akçe ve semeni hissesi mukābelesinde altı bin akçe ki cem‘an otuz beş bin altı yüz akçe kabz ettikde yine ol meclisinde dört bin sekiz yüz kıymetli eşyâ ve nısf hisse deyü yüz seksen beş guruş ve vasî olduğu Mirza Kapudanˈın evlâd-ı sıgārı mâlından müteveffâ-yı mezbûra idâne ve teslîm ettiği yüz yirmi iki guruşa cem‘an bi-hesâb-ı hurde kırk bir bin altı yüz akçeyi mezbûre Naime kabz edip kezâlik ol meclisde üç sehim hissesiçün yüz otuz guruş üç bin dört yüz akçe kıymetli eşyâ ki cem‘an on dokuz bin altı yüz akçe işbu müdde‘iyye-i mezbûre Fatma kabz edip beynlerinde ancak işbu altı nefer esirin taksîmi bâkī kalmışdı deyü def‘le mukābele edicek gıbbeˈl-istintâk vekîl-i mezbûr Ahmed Beşe hâlâ bâlâda tahrîr olunduğu üzre olup ber-vech-i mütebeyyin mukaddemâ beynlerinde bu vech üzere tevzî‘ ve taksîm olunduğunu ve andan mâ‘adâ merkūme Fatma Hatun ihrâcât-ı mezkûreden fazla hissesi mukābelesinde cem‘an on dokuz bin altı yüz akçeyi ol meclisde kabz ve istifâ’-i hak eylediğini biˈl-vekâle ikrâr ve i‘tirâf edicek mûcebiyle da‘vâ-yı mezkûresinden vekîl-i merkūm men‘ olunup mâ vaka‘a biˈt-taleb ketb olundu. Fiˈt-tâsi‘ veˈl-işrîn min-Şa‘bâniˈl-mu‘azzam li-sene erba‘a ve semânîn ve elf. Şuhûdüˈl-hâl: Süleyman Kapudan b. Mehmed, Abdullah Efendi b. Abdurrahman, Yusuf Çelebi b. Abdullah, Abdülkerim Odabaşı b. İskender, Hüseyin Kapudan b. Hasan, Mehmed Beşe b. Abdullah, Sunullah Çelebi b. Mehmed, Ekşi Mustafa Çelebi el-münâdî, Hüseyin Bey el-münâdî, İsa Bey, Hüseyin Çelebi b. Ali Sümme mâte Mehmed el-mezbûr ve tereke ümmen med‘uvveten Naima bt. Mustafa ve uhten li-ebeveyn med‘uvveten Safiye ve ammen li-ebeveyn med‘uvven Halil Bey b. İbrahim veˈl-verâsetü münhasıratün fîhim. Vaka‘aˈt-tahrîr fiˈs-sâni aşer min-şehri Ramazaniˈl-mübârek li-sene erba‘a ve semânîn ve elf. Babasından intikāl eden cümle mâl esedî 240, fî 120 28800 Karındaşı Ahmedˈden intikāl eden meblağ 9778 Yekûn 38578 Minhâ Techîz ve tekfîn 1200 Resm-i âdî 570 Kassâmiye 190 Kalemiye, ihzâriye 190 Mesârif-i müteferrika 450 Çukadâra 30 Merhûm-ı mezbûrun hâl-i sıgārında anası ve vasîsi hüccet-i şer‘iye ile verdiği günde sekiz akçe nafaka ki cem‘an senede 2880 Yekûn 5555 Sahhuˈl-bâkī 33023 Hisse-i üm 11007 Hisse-i bint 16544 Hisse-i am 5505