Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 480 Hüküm no: 317 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed b. Mirza’nın amcası Halil’in, mirastan hissesini diğer varis Naime’den aldığı Mahmiye-i Galata a‘mâlinden kasaba-i Kasımpaşaˈda Yahya Kethudâ mahallesinde sâkine iken bundan akdem vefât eden Mehmed b. Mirzaˈnın verâseti vâlidesi Naime bt. Mustafa Kapudan li-ebeveyn kız karındaşı [76b] Safiye ve li-ebeveyn ammisi Halil Bey b. İbrahimˈe münhasıra olduğu şer‘an zâhir ve müte‘ayyin oldukdan sonra merkūm Halil Bey meclis-i şer‘-i hatîrde tereke-i müteveffâ-yı mezbûre vâzi‘atüˈl-yed olan vâlidesi merkūme Naime tarafından husûs-ı âtiˈl-beyâna vekîl olup mezbûrenin zâtını ma‘rifet-i şer‘le ârifân olan Mehmed Efendi b. Ahmed ve Yusuf Çelebi b. Abdurrahman şehâdetleriyle şer‘an vekâleti sâbite olan mefharüˈl-beyân Kethudâyeri Ahmed Ağa b. Mustafa mahzarında ikrâr ve takrîr-i kelâm edip müteveffâ-yı mezbûre babası merkūm Mirzaˈdan hâric-i ez-defter-i kassâm-ı askerî intikāl eden her biri yüz yirmişer akçeden yirmi sekiz bin sekiz yüz akçe olmak üzere iki yüz kırk esedî guruş ile kendiden mukaddem fevt olan karındaşı Ahmedˈden intikāl eden dokuz bin yedi yüz yetmiş sekiz akçe ki cem‘an otuz sekiz bin beş yüz yetmiş sekiz akçeden müteveffâ-yı mezbûrun techîz ve tekfîn vesâir mesârif-i lâzımesine rızâmla hüccet-i şer‘iye ile bir senelik günde nafakasına ber-mûceb-i defter-i kassâm beş bin beş yüz yetmiş sekiz akçesini harc ve sarf olundukdan sonra bâkī kalan otuz üç bin akçeden benim hisse-i şer‘iyeme intikāl ve isâbet eden beş bin beş yüz akçe hakkımı vekîl-i mezbûr Ahmed Ağa yedinden biˈt-tamam veˈl-kemâl ahz u kabz edip mûrisim müteveffâ-yı mezbûrun sâir tereke-i ma‘lûme ve mechûlesi mutâlebesinden müvekkile-i merkūme Naimeˈnin zimmetini ibrâ-i âm kātıʻuˈn-nizâ‘la ibrâ ve ıskāt eyledim min-ba‘d husûs-ı mirasa müte‘allik vechen mineˈl-vücûh mezbûre Naimeˈden da‘vâ ve nizâ‘ım kalmadı eğer husûs-ı mezbûra müte‘allik benden biˈz-zât veyâ vekîlimden biˈl-vekâle dâ‘vâ sudûr ederse ledeˈl-hükkâmiˈl-kirâm mesmû‘a olmasın dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-şehri Ramazaniˈl-mübârek li-sene erba‘a ve semânîn ve elf. Şuhûdüˈl-hâl: Umdetüˈl-kuzât İbrahim Efendi b. Receb el-kādî, Fahrüˈl-kuzât Osman Efendi b. Mustafa, Ömer Çelebi b. eş-Şeyh Mehmed, Sunullah Çelebi b. Mehmed, Halil Çelebi b. Mehmed