Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 67 Hüküm no: 31 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem Çelebi’nin Portukal cemaatinden Samadya’ya olan borcunu ödediği için borç karşılığı alınan rehinlerin geri verilmesi Mahrûse-i Galata kazâsına tâbi‘ kasaba-i Kasım Paşa’da Câmi‘-i kebîr Mahallesi’nde sâkin işbu bâ‘isü’l-kitâb Muharrem Çelebi b. İsmail nâm kimesne meclis-i şer‘-i hatîr-i lâzımü’t-tevkīrde mahmiye-i İstanbul’da Portugal cemâ‘atinden Samadya bt. Asadur nâm Yahûdiye muvâcehesinde üzerine da‘vâ ve takrîr-i kelâm edip mezbûre Samadya’ya cihet-i karz-ı şer‘iyyeden dört bin akçe deynim olup meblağ-ı mezbûr mukābelesinde bir tek zümrüd küpe ve bir incili tepelik rehine vaz‘ eylemişdim. Hâlâ meblağ-ı [mezbûr] dört bin akçemi mezbûre Samadya’ya teslîm edip zikr olunan rehini bana teslîmden imtinâ‘ eder, suâl olunup alıverilmesi matlûbumdur dedikde gıbbe’s-suâl mezbûr Samadya cevâbında fi’l-vâki‘ müdde‘î-i mezbûrun deyni olan dört bin akçeyi bi’t-tamam ahz u kabz eyledim, zikr olunan meblağ-ı mezbûr mukābelesinde rehin olan tek zümrüd küpe ve bir incili tepelik hâlâ yedimde rehin olup meblağ-ı mezbûr için mukābelesinde irtihân eylemiş idim dedikde def‘ ve teslîme tenbîh olunup mâ-vaka‘a bi’t-taleb ketb olundu. Fi’t-târîhi’l-mezbûr. Şuhûdü’l-hâl: Mehmed Beşe b. Süleyman, Ramazan b. Yusuf, Rıdvan b. Abdullah, es-Seyyid Mehmed Efendi b. es-Seyyid Ali Efendi.