Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 543 Hüküm no: 358 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaymak Mehmed Kapudan’ın terekesinden varislere intikal eden bağın Hüseyin Ağa’ya satıldığı Mahmiye-i Galata hâricinde Şahkulu mahallesinde sâkine iken bundan akdem vefât eden Kaymak Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmed ile vâlidesi Hadîce Hatun bt. Hasanˈa münhasıra ve tashîh meseleleri dört sehimden i‘tibâr olunup sihâm-ı mezbûreden bir sehmi zevcesi merkūme ve üç sehmi vâlidesi mezbûreye isâbet ettiği şer‘an zâhir ve müte‘ayyin oldukdan sonra mezkûretân Âişe Hanım ve Hadîce Hatun taraflarından husûs-ı âtiˈl-beyâna hüccet-i şer‘iye ile vekîlleri olan Ramazan Çelebi b. Yusuf meclis-i şer‘-i hatîr-i lâzımüˈt-tevkīrde Dârüˈs-saltanatiˈl-aliyye Kostantıniyyetiˈl-mahmiye biˈl-fi‘il gümrük emîni olup işbu kitâb-ı sıhhat nisâbın sahibi olan umdetüˈl-emâcid veˈl-ekârim Hüseyin Ağa b. Yusuf tarafından ikrâr-ı câ’iˈz-zikri tasdîka vekîl olup bimâ-hüve nehciˈs-sübût şer‘an vekâleti sâbite olan mefharüˈl-eşbâh İsmail Ağa b. Osman mahzarında biˈl-vekâle ikrâr ve takrîr-i kelâm edip müteveffâ-yı mezbûr Kaymak Kapudanˈın ileˈl-vefât silk-i mülk-i sahîhinde münselik olup ba‘de vefâtihî bâlâda tafsîli mürûr ettiği vech üzre mezkûretâna biˈl-ırsiˈş-şer‘î intikāl eden medîne-i Üsküdar kazâsı a‘mâlinden Çengâr nâhiyesine tâbi‘ Kadıköy demekle şehîr karye sınırında dâhil-i Kalamış Çayırı kurbünde vâki‘ bir tarafından Abdullah nâm kimesne bağı ve bir tarafdan çayır-ı mezkûr ve bir tarafdan vâdî ve bir tarafından tarîk-i âm ile mahdûd otuz buçuk dönüm ve iki yüz zirâ‘ mülk-i mevrûs bağlarını bi-cümletiˈt-tevâbi‘ veˈl-levâhık ve kâffetüˈl-menâfi‘ veˈl-merâfık müvekkil-i müşârün-ileyh Hüseyin Ağaˈya üç yüz elli kıt‘a esedî guruşa safka-i vâhide ile tarafeynden îcâb ve kabûlü hâvî bey‘-ı bâtt-ı sahîh-i şer‘î ile biˈl-vekâle bey‘ edip ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûru müvekkil-i müşârün-ileyh yedinden vekâlet-i mahkiyem hasebiyle tamamen ahz u kabûl edip sâlifüˈz-zikr bağı mahâllinde kabza müvekkil-i müşârün-ileyhi taslît eyledim min-ba‘d mârrüˈz-zikr bağ mülk-i müşterâsıdır hasbe mâ yeşâ’ mutasarrıf olsun dedikde gıbbeˈt-tasdîk mâ vaka‘a biˈt-taleb ketb olundu. Fî-selh-i Şevvaliˈl-mükerrem li-sene 1084. Şuhûdüˈl-hâl: Mehmed Efendi kâtib-i gümrük, Ali defter-i defterdâr-ı vâridât sâbıkā, el-Hâc Hasan Efendi b. Abdülkadir, el-Hâc Ali Esterci, Pîrî Bey b. Mirza, Kadir Çelebi b. el-Hâc Mehmed, Receb Bey b. Mehmed, Ali Bey b. Ahmed, Muharrem Beşe b. Yusuf, el-Hâc Dilaver b. Abdullah