Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 548 Hüküm no: 364 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın, merhum Sebzecizâde Mehmed Çelebi’deki alacağını varislerden talep ettiği Mahmiye-i İstanbulˈda Hadîka-i hâssa civârında Timurkapı kurbünde sâkin işbu bâ‘isüˈl-kitâb mefharüˈl-akrân Mehmed Ağa b. Ahmed el-yesârî meclis-i şer‘-i hatîr-i lâzımüˈt-tevkīrde mahrûse-i Galataˈya tâbi‘ kasaba-i Tophâneˈde Ebufazl mahallesi sükkânından iken bundan akdem müteveffâ olan Sebzecizâde Mehmed Çelebiˈnin karındaşı ve sagīr oğlu diğer Mehmedˈin tesviye-i umûri’çün mansûb vasîsi olan Hüseyin Çelebi b. Ali mahzarında üzerine da‘vâ ve takrîr-i kelâm edip müteveffâ-yı mezbûr sıhhati hâlinde kendi mâlımdan ve yedimden istikrâz ve kabz eylediği beş yüz kırk kıt‘a esedî guruş ile mütevellîsi olduğum İstanbul Ağası vakfından kezâlik yedimden istidâne ve ahz ettiği mezbûruˈn-nakd beş yüz esedî guruş ve kız karındaşı, zevcem Hadîce Hatun mâlından zimmetinde deyni olmağla bana havâle olunan mezkûrüˈn-nakd seksen esedî guruş ki min-haysüˈl-mecmû‘ bin beş yüz yirmi kıt‘a esedî guruş bana deyni olup hâl-i hayatında minvâl-i muharrer üzere alâ-ruûsiˈl-işhâd ikrâr ve işhâd dahi eyledi lâkin kableˈl-ahz vefât eylemeğin hâlâ terekesinden vermek üzere vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr müdde‘î-i mezbûrdan da‘vâsına mutâbık beyyine taleb olundukda udûl-ı Müslimînˈden Musa Bey b. Hüseyin ve Mehmed Efendi b. Mustafa ve Mustafa Çelebi b. Ahmed nâm kimesneler li-ecliˈş-şehâde hâzırûn olup isreˈl-istişhâd fiˈl-vâki‘ müteveffâ-yı mezbûr sıhhati hâlinden müdde‘î-i mezbûr Mehmed Ağaˈya bâlâda mastûr olduğu üzre cem‘an bin yüz yirmi kıt‘a esedî guruş zimmetimde lâzımüˈl-edâ deynimdir deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’itiˈl-kabûl şehâdetleri makbûle olmağla ba‘deˈt-tahlîf mûcebiyle vasî-i mezbûra tenbîh olunup mâ vaka‘a biˈt-taleb ketb olundu. Fiˈl-yevmiˈl-âşir min-Şevvaliˈl-mükerrem li-sene erba‘a ve semânîn ve elf. Şuhûdüˈl-hâl: Mustafa Çelebi b. Hudâverdi Çelebi, el-Hâc Ömer b. Mustafa, Ali Beşe b. Nasuh, Receb Beşe b. Mehmed, Mehmed Bey b. Ahmed, Musa Hoca b. Veli, Halil b. Ahmed, Mustafa b. Firuz, Mehmed Çelebi b. Ahmed ve gayruhum.