Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 565 Hüküm no: 381 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin, merhum Kaymak Kapudan’dan varislere intikal eden mülk bağı, varislerin vekilinden satın aldığı Mahmiye-i Galata hâricinde Şahkulu mahallesinde sâkin iken bundan akdem vefât [eden] Kaymak Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmed ile anası Hadîce bt. Hasanˈa münhasıra olduğu şer‘an zâhir ve müte‘ayyin oldukdan sonra mezbûretânın vekîl-i müseccelleri olan Ramazan Çelebi b. Yusuf meclis-i şer‘-i şerîfde işbu râfi‘üˈr-rakīm Süleyman Çelebi b. Abdurrahman mahzarında biˈl-vekâle ikrâr ve takrîr-i kelâm edip müteveffâ-yı mezbûrun mülkü olup ba‘de vefâtihî merkūmetâna intikāl ve isâbet eden medîne-i Üsküdar kazâsı a‘mâlinden Kadıköy nâm karye sınırında dâhil Kızıltoprak nâm mevzi‘de vâki‘ bir tarafdan Emrullah Ağa bağı ve bir tarafdan Müezzin Ahmed bağı ve bir tarafdan Cebecioğulları bağı ve bir tarafdan ba‘zan türbe bekçisi ve ba‘zan Malhazanoğulları ve ba‘zan tarîk-i hâssa müntehî tahmînen yüz yirmi dönüm mülk-i kebîr bağı müvekkilelerim merkūmetân mezbûr Süleyman Çelebiˈye tarafeynden îcâb ve kabûlü hâvî bey‘-ı bâtt-ı sahîh-i şer‘î ile altı yüz esedî guruşa bey‘ edip ol dahi ba‘deˈl-iştirâ veˈl-kabûl semeni olan meblağ-ı mezbûr altı yüz esedî guruşu vekâletim hasebiyle mezbûr Süleyman Çelebi yedinden biˈt-tamam alıp kabz edip zikrolunan bağı mahâllinde kabz ve tasarrufunu mezbûr Süleyman Çelebiˈyi taslît eyledim min-ba‘d mülk-i müşterâsı olmuşdur hasbe mâ yeşâ’ mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-yevmiˈl-âşir min-Zilkaʻdetiˈş-şerîfe li-sene erba‘a ve semânîn ve elf. Şuhûdüˈl-hâl: el-Hâc İsmail Ağa b. el-Hâc Hasan, el-Hâc Hasan Efendi b. Abdülgaffar, Sipâhizâde Mehmed Ağa, Halil Efendi b. İskender, el-Hâc Mustafa b. Bayram, el-Hâc Mehmed b. Mustafa, Küçük Mehmed Beşe b. Mustafa, Sinan Reis b. Mehmed, Halil Çelebi b. Zülfikar, Şahbaz Bey b. Abdullah, Muharrem Beşe b. Yusuf el-münâdî, Halil b. Mehmed, Hüseyin Çelebi b. Ali, İsa Bey b. Halil.