Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 565 Hüküm no: 382 Orijinal metin no: [92a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin, merhum Kaymak Kapudan’dan varislere intikal eden mülk bağı varislerin vekilinden satın aldığı Mahmiye-i Galata hâricinde Şahkulu mahallesinden olup bundan akdem vefât eden Kaymak Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmedˈe ve anası Hadîce bt. Hasanˈa münhasıra olduğu şer‘an zâhir ve müte‘ayyin oldukdan sonra mezbûretânın vekîl-i müseccelleri olan Ramazan Çelebi b. Yusuf meclis-i şer‘-i şerîfde işbu râfi‘üˈl-vesîka Süleyman Çelebi b. Abdullah mahzarında biˈl-vekâle ikrâr ve takrîr-i kelâm edip müteveffâ-yı mezbûrun ileˈl-vefât mülkü olup ba‘de vefâtihî intikāl ve isâbet eden medîne-i Üsküdar kazâsına tâbi‘ Kadıköy nâm karyede Modaburnu nâm mevzi‘de vâki‘ bir tarafı Yazıcı zimmî mülkü ve bir tarafdan Aliko [92b] nâm zimmî bağı ve bir tarafı Hüseyin nâm kimesne bağı ve bir tarafı ba‘zan kenîse vakfı olan bağ ve ba‘zan sâhil-i bahr ile mahdûd tahmînen on sekiz dönüm bağı cemî‘ tevâbi‘iyle biˈl-vekâle merkūm Süleyman Çelebiˈye tarafeynden îcâb ve kabûlü hâvî bey‘-ı bâtt-ı sahîh-i şer‘î ile iki yüz esedî guruşa bey‘ edip ol dahi iştirâ ve kabûl eyledikden sonra semeni olan meblağ-ı mezbûr iki yüz esedî guruşu mezkûr Süleyman Çelebi yedinden biˈl-vekâle ahz u kabz edip mahâllinde zikrolunan bağı kabz ve tasarrufa mezbûr Süleyman Çelebiˈye taslît eyledim ba‘deˈl-yevm mülk-i müşterâsıdır hasbe mâ yeşâ’ mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-Zilkaʻdetiˈş-şerîfe li-sene erba‘a ve semânîn ve elf. Şuhûdüˈl-hâl: es-Sâbıkūn