Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 567 Hüküm no: 384 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın, merhum Kaymak Kapudan’dan varislere intikal eden köşkü varislerin vekilinden satın aldığı Mahmiye-i Galata hâricinde Şahkulu mahallesinde sâkin iken bundan akdem vefât eden Kaymak Kapudan b. Rıdvanˈın verâseti zevce-i metrûkesi Âişe Hanım bt. Mehmed ile vâlidesi Hadîce Hatun bt. Hasanˈa münhasıra olduğu şer‘an zâhir ve müte‘ayyin oldukdan sonra merkūmetânın vekîl-i müseccelleri olan Ramazan Çelebi b. Yusuf meclis-i şer‘-i hatîrde işbu râfi‘üˈl-vesîka el-Hâc Hasan b. Süleyman mahzarında biˈl-vekâle ikrâr ve takrîr-i kelâm edip müteveffâ-yı mezbûrun ileˈl-vefât taht-ı tasarrufunda mülk-i hakkı olup ba‘de vefâtihî mezbûretâna isâbet eden medîne-i Üsküdar kazâsına tâbi‘ Kadıköy nâm karyede câmi‘ kurbünde vâki‘ bir tarafdan Mehmed Çelebi b. Osman Efendiˈnin vakf odalarına ve bir tarafdan Alime Hatun mülküne ve bir tarafdan Kalender Hatun mülküne ve bir tarafdan tarîk-i âmma müntehî bir köşk ve bir dolab kuyusu zevât-ı eşcâr-ı müsmire ve gayr-ı müsmire hadîkayı müştemil mülk bağçelerini cemî‘ tevâbi‘iyle vekâletim hasebiyle merkūm el-Hâc Hasanˈa kırk bin akçeye bey‘-ı bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semeni olan meblağ-ı mezbûru merkūm el-Hâc Hasan yedinden tamamen alıp kabz edip zikrolunan bağçeyi mahâllinde kabza mezbûr el-Hâc Hasanˈa taslît eyledim min-ba‘d mülk-i müşterâsıdır hasbe mâ yeşâ’ mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-Zilka‘detiˈş-şerîfe li-sene erba‘a ve semânîn ve elf. Şuhûdüˈl-hâl: es-Sâbıkūn