Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 566 Hüküm no: 383 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin, merhum Kaymak Kapudan’dan varislere intikal eden mülk bağı varislerin vekilinden satın aldığı Mahmiye-i Galata hâricinde Şahkulu mahallesinde sâkine iken bundan akdem vefât eden Kaymak Kapudan b. Rıdvanˈın zevce-i metrûkesi Âişe Hanım bt. Mehmedˈe münhasıra ve anası Hadîce Hatun bt. Hasanˈa münhasıra olduğu şer‘an zâhir ve mütebeyyin oldukdan sonra merkūmetân taraflarından zikri câ’î husûsa vekîl-i müsecceli olan Ramazan Çelebi b. Yusuf meclis-i şer‘-i şerîfde işbu bâ‘isüˈl-vesîka Süleyman Çelebi b. Abdullah mahzarında biˈl-vekâle ikrâr ve takrîr-i kelâm edip müteveffâ-yı mezbûrun medîne-i Üsküdar kazâsına tâbi‘ Kadıköy nâm karyede vâki‘ Modaburnu nâm mevzi‘de iki tarafdan sâhil-i bahr ve bir tarafda Foka nâm zimmî bağı ve bir tarafdan Kara Kasavat nâm zimmî bağı ile mahdûd tahmînen otuz dönüm mülk bağı ileˈl-vefât mülk ve hakkı olup ba‘de vefâtihî müvekkilelerim mezbûretâna intikāl ve isâbet etmekle hâlâ biˈl-vekâle mezbûr Süleyman Çelebiˈye zikrolunan bağı tarafeynden îcâb ve kabûlü hâvî bey‘-ı bâtt-ı sahîh-i şer‘î ile dört yüz esedî guruşa bey‘ edip ol dahi iştirâ ve kabûl eyledikden sonra semeni olan meblağ-ı mezbûr dört yüz esedî guruş vekâletim hasebiyle mezbûr Süleyman Çelebi yedinden biˈt-tamam veˈl-kemâl ahz u kabz eyledim ba‘deˈl-yevm zikrolunan bağ-ı mezkûr Süleyman Çelebiˈnin mülk-i müşterâsı ve hakk-ı sırfı olmağla mahâllinde kabza mezbûr Süleyman Çelebiˈyi taslît eyledim hasbe mâ yeşâ’ mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-âşir min-Zilka‘detiˈş-şerîfe li-sene erba‘a ve semânîn ve elf. Şuhûdüˈl-hâl: es-Sâbıkūn