Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 573 Hüküm no: 388 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rodoslu Mehmed Kapudan’dan varislere intikal eden esirlerin borçların ödenmesi için Mehmed Çelebi’ye satıldığı Mahmiye-i Galata muzâfâtından kasaba-i Kasımpaşaˈda el-Hâc Hasan mahallesinde sâkin olup bundan akdem vefât eden Rodoslu Mehmed Kapudan b. Yusufˈun verâseti zevce-i metrûkesi Âişe bt. Elvan ile vâlidesi Âişeˈye ve li-ebeveyn kız karındaşı Sâliha ve li-üm er karındaşı İvaz sagīr ve kız karındaşları Hadîce ve Hacileˈye münhasıra olduğu şer‘an zâhir ve müte‘ayyin oldukdan sonra merkūm Âişe bt. Elvanˈın vekîl-i müsecceli olan Ahmed Efendi b. Ali ile mezbûr İvaz sagīr meclis-i şer‘de işbu bâ‘isüˈl-vesîka Mehmed Çelebi b. Kenan Hoca mahzarında her biri ikrâr ve takrîr-i kelâm edip mûrisimiz müteveffâ-yı mezbûrun düyûn-ı kesîre-i müsbetesi olup tereke-i menkūlesi düyûn-ı mezbûreye vefâ etmemekle cümle muhallefâtından olup esâmîleri defter-i kassâm-ı askerîde mukayyed olan yirmi iki nefer esirleri dahi bey‘ olunmak lâzım gelmekle biˈl-izniˈş-şer‘î zarûret-i düyûn-ı mezkûre-i müsbete içün hâssa münâdîlerden Mehmed Çelebi b. Mustafa yediyle yirmi beş gün sûk-ı sultânîde ve mecma‘-ı nâs olan tersâne-i âmirede beyneˈt-tâlibîn bey‘a arz ve nidâ ve müzâyede eyledikde her bir neferi yetmişer esedî guruşdan mezbûr Mehmed Çelebi b. Kenan Hoca üzerinde karâr ve ziyâde ile tâlib-i âhar olmamağla zikrolunan yetmişer esedî guruş sâlifüˈz-zikr esirlerin semen-i misli olduğu zeyl-i kitâbda isimleri muharrer olup husûs-ı mezbûra vukūfı olan sikāt-ı sahîhatüˈl-kelimât bî-garaz Müslimîn haberleriyle ledeˈş-şer‘ müte‘ayyin oldukdan sonra biˈl-izniˈş-şer‘ her birimiz asâleten ve vekâleten mârrüˈz-zikr yirmi iki nefer esirleri yetmişer esedî guruşdan cem‘an bin beş yüz kırk esedî guruşa asâleten ve vekâleten mârrüˈz-zikr yirmi iki nefer esirleri tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi ba‘deˈl-iştirâ veˈt-tesellüm semeni olan meblağ-ı mezbûr bin beş yüz kırk esedî guruşu merkūm Mehmed Çelebi yedinden tamamen alıp kabz eyledik ba‘deˈl-yevm zikrolunan yirmi iki nefer esirler merkūm Mehmed Çelebiˈnin mülk-i müşterâsıdır hasbe mâ yeşâ’ mutasarrıf olsun dedikde gıbbeˈt-tasdîkiˈl-mu‘teber mâ vaka‘a biˈt-taleb ketb olundu. Fiˈl-âşir min-Zilka‘de senetiˈr-râbi‘ ve semânîn ve elf. Şuhûdüˈl-hâl: Halil Ağa b. Mehmed, Mustafa Çelebi b. Elvan, Selim Çelebi b. Mehmed, Mehmed Ağa b. Muslı, Mustafa Çelebi b. el-Hâc Mehmed, Ahmed Çelebi b. Mustafa, İsmail Çelebi b. Hasan, Osman Reis b. Mehmed, Hasan Odabaşı b. Osman, Osman Çelebi b. Bekir