Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 574 Hüküm no: 389 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Kapudan’ın, merhum Saraç Mustafa Kapudan’daki alacağını vasîden talep ettiği Mahmiye-i İstanbulˈda Balkapanı kurbünde zümre-i tâcirînden işbu bâ‘isüˈr-rakīm el-Hâc Mehmed Kapudan nâm kimesne meclis-i şer‘-i hatîr-i lâzımüˈt-tevkīrde mahrûse-i Galataˈya tâbi‘ kasaba-i Tophâneˈde el-Hâc Memi mahallesi sâkinlerinden olup bundan akdem Akdenizˈde şehîden vefât eden Sarrâc Mustafa Kapudanˈın evlâd-ı sıgārının tesviye-i umûrları’çün kıbel-i şer‘den mansûb vasîleri olmağla muhallefâtına vâzi‘uˈl-yed olan Abdülkadir Çelebi b. ( ) mahzarında üzerine da‘vâ ve takrîr-i kelâm edip müteveffâ-yı mezbûrun sıhhati hâlinde cihet-i deyn-i şer‘îden bin altı yüz kıt‘a esedî guruş hakkım olup diyâr-ı Mısırˈa gider oldukda meblağ-ı mezbûr hâlâ zimmetinde deynidir deyip alâ-ruûsiˈl-işhâd ikrâr dahi etmişdir lâkin kableˈl-ahz vefât etmekle tereke-i vâfiyesinden vermek üzre ve hatta mezbûrdan taleb ederim suâl olunup beyyine taleb olundukda udûl-ı Müslimînˈden olan Dilaver Ağa b. Abdullah ve İbrahim Çelebi b. Hüseyin nâm kimesneler li-ecliˈş-şehâde hâzırân olup isreˈl-istişhâd fiˈl-vâki‘ müteveffâ-yı mezbûr hâlinde bizim huzûrumuzda müdde‘î-i mezbûra ber-vech-i muharrer bin [94a] altı yüz kıt‘a esedî guruş zimmetinde lâzımüˈl-edâ deynim vardır deyü ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra gıbbeˈt-tahlîfiˈş-şer‘î mûcebiyle vasî-i mezbûra tenbîh olunup mâ vaka‘a biˈt-taleb ketb olundu. Fiˈl-yevmiˈl-âşir min-Şaʻbâniˈl-mu‘azzam li-sene 1084. Şuhûdüˈl-hâl: es-Seyyid Mehmed b. Abdullah, el-Hâc Ahmed b. Abdullah, Behram Bey b. Kayık kapıcı, Ali b. Hasan, Mehmed b. Ahmed.