Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 576 Hüküm no: 393 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan Bey’in, merhum Şişeci Bali Beşe’nin çocuklarına vasî tayin olduğu ve çocukların terekesini Bali’nin karısı Canfeda’dan talep ettiği İşbu sahibüˈl-kitâb Rıdvan Bey b. Abdülvahhab meclis-i şer‘-i hatîrde medîne-i Hazret-i Ebâ Eyyûbeˈl-Ensârî mahallâtından Kiremitçi Süleyman mahallesinde sâkin iken bundan akdem vefât eden Şişeci Bali Beşe b. Behramˈın verâseti zevce-i metrûkesi Canfeda bt. Abdullah ile sulbî sagīr oğlu Ali ve mezbûre Canfedaˈnın batnında hâsıl hamle münhasıra olduğu şer‘an zâhir ve müte‘ayyin oldukdan sonra tereke-i müteveffâ-yı mezbûre vâzi‘atüˈl-yed olan mezbûre Canfeda mahzarında üzerine da‘vâ ve takrîr-i kelâm edip müteveffâ-yı mezbûr hâl-i marazında bi-emrillâhi te‘âlâ vefâtımdan sonra zevcem mezbûre Canfeda sümün hissesini kabz ettikden sonra oğlu mezbûre ve firâşımdan hâsıla hamle isâbet eden seb‘a-i esmânı terekeyi hadd-i bulûğlarına değin hıfz ve hallerini zabta beni vasî-i muhtâr nasb ve ta‘yîn ve ben dahi ba‘deˈl-kabûl musırratan alâ-hâzeˈl-ikrâr vefât edip sıhhati hayatında alâ-ruûsiˈl-işhâd ikrâr ve işhâd dahi etmekle hâlâ mezbûre Canfedaˈdan sagīr-i mezbûr ile haml-i mezkûrun hisselerini tereke-i müteveffâ-yı mezbûrdan taleb ederim suâl olunsun dedikde gıbbeˈs-suâl veˈl-inkâr ve isre- talebiˈl-beyyine udûl-ı Müslimînˈden olup es-Seyyid Yusuf Çelebi b. es-Seyyid Ali ve İbrahim Çelebi b. Mustafa ve Altıncı Mehmed Çelebi b. Mahmud ve Ahmed Çelebi b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr bâlâda tafsîli mürûr ettiği vech üzere mezbûr Rıdvan Beyˈi huzûrumuzda vasî-i muhtâr nasb ve ta‘yîn ol dahi kabûl eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre ri‘âyeti şerâ’itiˈl-kabûl gıbbe ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈl-işrîn min-Zilhiccetiˈş-şerîfe sene [10]84 Şuhûdüˈl-hâl: Mehmed Efendi el-imâm, Mehmed Çelebizâde Taştaş, Ahmed Çelebi b. Mehmed, Mustafa Bey b. Murad, el-Hâc İbrahim b. Mehmed, Ahmed Beşe b. Osman, Mehmed Çelebi b. Mehmed, Ali b. Mehmed, Mehmed Çelebi b. Ömer, Ahmed b. Osman.