Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 581 Hüküm no: 399 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Döndü bt. Mustafa’nın, kocası merhum Süleyman b. Mehmed’den kendisine intikal eden miras hisselerini vekili aracılığıyla Mehmed Beşe’den teslim aldığı Mahmiye-i Galata a‘mâlinden kasaba-i Fındıklıˈda Selime Hatun mahallesinden olup bundan akdem vilâyet-i Anadoluˈda Akovaˈda vefât eden Süleyman b. Mehmedˈin verâseti zevce-i metrûkesi Döndü bt. Mustafa ile kebîr oğlu Mehmed Beşeˈye münhasıra olduğu şer‘an zâhir ve müte‘ayyin oldukdan sonra mezbûre Döndü tarafından husûs-ı âtiˈl-beyâna vekîl olup mezbûrenin zâtını ma‘rifet-i [şerʻiyye ile] ârifân olan Mustafa Beşe b. Ahmed ve diğer Ahmed ve diğer Mustafa Beşe b. Mehmed şehâdetleriyle şer‘an vekâleti sâbite olan el-Hâc Ramazan Beşe b. Rasûl meclis-i şer‘de müteveffâ-yı mezbûrun terekesine vâzi‘uˈl-yed olan işbu bâ‘isüˈl-vesîka merkūm Mehmed Beşe mahzarında biˈl-vekâle ikrâr ve takrîr-i kelâm edip müteveffâ-yı mezbûrun mahalle-i mezbûrede vâki‘ on sekiz bin akçeye mukavvem ma‘lûmüˈl-hudûd veˈl-müştemilât bir mülk menzili ile altı bin akçe kıymetli bir çenber kayık ve her biri yüz yirmişer akçeden dokuz bin üç yüz altmış akçe olmak üzere yetmiş sekiz esedî guruş nakd ile iki bin otuz akçe kıymetli eşyâ-i menkūlesi ki min-haysüˈl-mecmû‘ otuz beş bin üç yüz doksan akçe kıymetli muhallefâtından müvekkile-i mezbûrenin zevci zimmetinde mütekarrer olan iki bin akçe mehr-i müecceli ile beyinlerinde ma‘lûm iki bin yüz doksan akçe masrafla cem‘an dört binyüz doksan akçe ihrâç olundukdan sonra bâkī kalan otuz bir bin iki yüz akçeden müvekkilem mezbûrenin sümün hissesine isâbet eden üç bin dokuz yüz akçe ile mehr-i müecceli olan iki bin akçe ki cem‘an beş bin dokuz yüz akçeyi müvekkilem mezbûre mezkûr Mehmed Beşe yedinden ahz u kabz ettikden sonra yine müvekkilem mezbûre Döndü Hatunˈa merkūm Mehmed Beşe bi-tarîkıˈl-karz yetmiş sekiz esedî guruş da‘vâ ve taleb etmişidi elhâletü hâzihî tavassut-ı müslihîn ile merkūm Mehmed Beşe yedinden müvekkilem mezbûre on beş esedî guruş dahi kabz edip mâ‘adâ olan altmış üç esedî guruş mutâlebesinden ve tereke-i merkūmeye müte‘allika da‘vâdan müvekkilem mezbûre merkūm Mehmed Beşeˈnin zimmetini ibrâ-i âm ile ibrâ ve ıskāt eyledi min-ba‘d müteveffâ-yı merkūmun menzilinde ve kayığında ve eşyâ-i menkūlesinde ve nükūdunda müvekkilem mezbûrenin hak ve alâkası kalmadı dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-hâmis veˈl-işrîn li-sene erba‘a ve semânîn ve elf. Şuhûdüˈl-hâl: Mehmed Efendi b. Şa‘bân el-imâm, Mehmed Çelebi b. Mustafa, Ömer Çelebi b. Mehmed, İsmail Beşe el-mübâşir, İbrahim Beşe b. Mustafa, Süleyman b. Abdullah, Mehmed Çelebi b. Ahmed, Mustafa Çelebi b. Veli, Süleyman Beşe b. Mustafa, Osman b. Ahmed, Mustafa Beşe b. ( ) el-mübâşir