Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 586 Hüküm no: 403 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hüseyin’den varislerden Ümmühani’ye intikal eden ev hissesinin yine diğer varislerden Musa’ya satıldığı Mahmiye-i Galataˈya [tâbiʻ] kasaba-i Tophâne mahallâtından İlyas Çelebi mahallesinde sâkine iken bundan akdem fevt olan el-Hâc Hüseyinˈin verâseti zevce-i metrûkesi Zamâne bt. Abdullah ile sulbî kebîr oğlu el-Hâc Musa ve sulbiye kebîre kızı Fatmaˈya münhasıra olup kableˈl-kısme mezbûre Fatma müteveffât olup verâseti sadrî sagīr oğlu Mustafaˈya ve sadriye kebîre kızları Âişe ve Ümmühaniˈye münhasıra olduğu şer‘an zâhir ve mütebeyyin oldukdan sonra mahalle-i mezbûrede vâki‘ bir tarafı el-Hâc Musa mülkü ve bir tarafı ba‘zan Ali Çelebi ve ba‘zanel-Hâc Piyale ve ba‘zan Emine Hatun mülkleri ve bir tarafı mezbûr el-Hâc Musa mülkü ve bir tarafı tarîk-i hâs ile mahdûd iki bâb fevkānî oda ve iki sofa ve matbahı ve iki bâb tahtânî odaları ve kilâr ve bi’r-i mâ’i ve sarnıcı ve bağçeyi müştemil menzil-i müteveffâ-yı evvelin mülkü olup menzil-i mezbûr alâ-tarîkıˈl-münâsaha mes’eleleri doksan altı sehimden i‘tibâr olunup sihâm-ı mezkûreden elli altı sehmi merkūm el-Hâc Musaˈya ve on iki sehmi mezbûre Zamâne ve yedi sehmi mezbûre Âişeˈye kezâlik yedi sehmi mezbûre Ümmühaniˈye ve on dört sehmi sagīr-i merkūm Mustafaˈya isâbet eylediği mütebeyyin ve mütehakkık olmağla kasaba-i mezbûre mahallâtından el-Hâc Durmuş ve el-Hâc Piyale nâm kimesneler ile zâtını mu‘arrefe olan mezbûre Ümmühani meclis-i şer‘-i hatîr-i lâzımüˈt-tevkīrde işbu bâ‘isüˈl-kitâb merkūm el-Hâc Musa mahzarında ikrâr ve takrîr-i kelâm edip menzil-i mahdûd-ı mezkûrdan yedi sehmi hisse-i şâyi‘amı yetmiş üç kıt‘a esedî guruşa merkūm el-Hâc Musaˈya bey‘-ı bât edip ol dahi iştirâ ve kabûl eyledikden sonra semeni olan meblağ-ı mezbûr yetmiş üç kıt‘a esedî guruşu merkūm el-Hâc Musa yedinden biˈt-tamam veˈl-kemâl ahz u kabz eyledim ba‘deˈl-yevm menzil-i mahdûd-ı mezkûrda olan yedi sehim hisse-i şâyi‘am mülk-i müşterâsıdır keyfe mâyeşâ’ ve yahtâr mutasarrıf olsun dedikde gıbbeˈt-tasdîk biˈt-taleb ketb olundu. Hurrire fiˈl-yevmiˈs-sâmin-i aşer min-Zilka‘detiˈş-şerîfe li-sene erba‘a ve semânîn ve elf. Şuhûdüˈl-hâl: es-Sâbıkūn