Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 594 Hüküm no: 406 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebham ve David Yahudilerin, merhum Kaymak Kapudan’ın zimmetindeki alacaklarını varislerden talep ettikleri Mahmiye-i Galataˈda Alman cemâ‘atinden Ebham v. Yahya ve Mesine cemâ‘atinden David v. Yahûda nâm Yahûdiler meclis-i şer‘-i şerîfde mahmiye-i mezbûre hâricinde Şahkulu mahallesinde sâkin iken bundan akdem vefât eden Kaymak Kapudan b. Rıdvanˈın verâseti zevce-i metrûkesi Âişe Hanım bt. Mehmed ile anası Hadîce bt. Hasanˈa münhasıra olduğu şer‘an zâhir ve müte‘ayyin oldukdan sonra mezkûretânın cem‘î emirlerine vekîl-i müseccelleri olan Ramazan Çelebi b. Yusuf mahzarında her biri üzerine da‘vâ ve takrîr-i kelâm edip müteveffâ-yı mezbûrun zimmetinde cihet-i karz-ı şer‘îden sekiz yüz yirmi beş esedî guruş hakkımız olup meblağ-ı mezbûru kableˈl-istifâ vefât edip hâl-i hayatında meblağ-ı merkūm bize deyni olduğunu huzûr-ı Müslimînˈde ikrâr ve işhâd dahi etmekle hâlâ terekesine vâzi‘uˈl-yed olan vekîl-i mezbûrdan taleb ederiz suâl olunsun dedikde gıbbeˈs-suâl ve akībeˈl-inkâr merkūmân Yahûdilerden müdde‘âlarına beyyine taleb olundukda udûl-ı Müslimînˈden Çukacı el-Hâc Mahmud Çelebi b. İbrahim ve Mehmed Çelebi b. Abdullah ve Kantarcı Ahmed Ağa nâm kimesneler li-ecliˈş-şehâde meclis-i şer‘a hâzırûn olup isreˈl-istişhâd fiˈl-hakīka müteveffâ-yı mezbûr Kaymak Mehmed Kapudan hayatında müdde‘iyyân-ı mezbûrân Yahûdilere cihet-i karz-ı şer‘îden sekiz yüz yirmi beş esedî guruş zimmetimde deynim vardır huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde [98a] gıbbe ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyyân-ı mezbûrân ba‘deˈt-tahlîfiˈl-mu‘teber mûcebiyle hükm birle mâ vaka‘a biˈt-taleb ketb olundu. Fiˈs-sâlis veˈl-işrîn min-Zilka‘de li-sene erba‘a ve semânîn ve elf. Şuhûdüˈl-hâl: Abdülhalim Efendi b. Mehmed, Nazillili Mehmed Efendi sâkin-i Hazret-i Eyüb, Hüseyin Çelebi b. Ali, İsa Bey b. Halil, Mehmed Bey b. Ömer el-emîn