Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 610 Hüküm no: 419 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mahmud Efendi’nin Şâkire adlı cariyesini Ali Beşe’ye hibe ettiği Mahmiye-i Galata dâhilinde Câmi‘-i Kebîr mahallesinde sâkine işbu bâ‘isüˈl-vesîka Ali Beşe b. Mehmed meclis-i şer‘-i şerîfde mahalle-i mezbûrede sâkin iken bundan akdem vefât eden Mahmud Efendi b. Bilal nâm kimesnenin verâseti zevceteyn-i metrûketeyn Cemile bt. Mehmed ve Nazile bt. Abdullah nâm hatunlardan gayrı zâhirde vâris-i ma‘rûfu olmamağla terekesinin rub‘ı zevceteyn-i mezbûreteyne ve selâse erbâ‘ı beytü’l-mâle isâbet etmeğin mezbûretân ile mahmiye-i mezbûre tevâbi‘i emîni olan Mehmed Ağa b. Yahya mahzarlarında üzerlerine da‘vâ ve takrîr-i kelâm edip müteveffâ-yı mezbûrun mülkü olup mülkünde olduğu hâlde bana hîbe ve teslîm eylediği işbu meclis-i şer‘de mevcûd orta boylu açık kaşlı Rusiyyetüˈl-asl Şâkire bt. Abdullah nâm câriyesini vech-i muharrer üzere bana hîbe ve teslîmini huzûr-ı Müslimînˈde ikrâr ve işhâd dahi etmişken hâlâ mezbûr ile emîn-i mezbûr vaz‘-ı yed murâd ederler suâl olunup men‘ olunmaları matlûbumdur dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden es-Seyyid el-Hâc Mehmed Çelebi b. es-Seyyid Hamid ve Ahmed Çelebi b. Mehmed nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vakt müteveffâ-yı mezbûr hayatında câriye-i memlûkesini merkūm Ali Beşeˈye huzûrumuzda hîbe ve teslîm ol dahi kabz edip biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle bi-vech ta‘arruzdan mezbûrûn men‘ olunup mâ vaka‘a biˈt-taleb ketb olundu. Fî 15 min-Zilhicce sene [10]84. Şuhûdüˈl-hâl: Hüseyin Efendi b. İsmail, Mustafa Efendi b. Zeynelabidin, Ali Efendi b. Mehmed, el-Hâc Hasan Hamamcı, Mahmud Çelebi b. Mustafa, İbrahim b. Ramazan, Ahmed b. Osman