Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 611 Hüküm no: 420 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mahmud Efendi’nin techiz, tekfin, hayır ve hasenatı yapılacak harcamalar için Ramazan Beşe’yi vekil tayin ettiği Mahmiye-i Galataˈda Câmi‘-i Kebîr mahallesinde sâkin iken bundan akdem vefât eden Mahmud Efendi b. Bilalˈin verâseti zevceteyn-i metrûkeyn Cemile bt. Mehmed ve Nazile bt. Abdullah nâm hatunlardan gayrı vâris-i ma‘rûfu olmamağla terekesinin rub‘ı mezbûretâna ve selâse erbâ‘ı cânib-i beytü’l-mâle isâbet etmeğin hâlâ mahmiye-i mezbûre ve tevâbi‘i emîni olan Mehmed Ağa b. Yahyaˈya münhasıra oldukdan sonra işbu bâ‘isüˈl-vesîka Ramazan Beşe b. Mahmud meclis-i şer‘de emîn-i mezbûr ile merkūmetân mahzarlarında üzerlerine da‘vâ ve takrîr-i kelâm edip müteveffâ-yı mezbûr hâl-i marazında bi-emrillâhi te‘âlâ vefât ettiğimden sonra terekemin sülüsü ifrâz olunup içinden techîz ve tekfîn ve yevm-i mevtimde ve üçümde ve yedimde ve kırkımda ve senemde mu‘tâd üzre tabh-ı ta‘âm olunup it‘âm-ı fukarâ-yı Müslimîn oluna deyü vasiyete ve ikrâr ve tenfîze beni vasî-i muhtâr nasb ve ta‘yîn ve ben dahi ba‘deˈl-kabûl musırratan alâ-hâzeˈl-ikrâr vefât edip terekesinin sülüsü dahi vasiyyet-i mezkûresine müsâ‘id olmağla hâlen mezkûrûnun yedlerinde olan terekeden biˈl-vesâye taleb ederim suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden eş-Şeyh Fethullah Efendi b. Abdülmennan ve Hüseyin Efendi b. İsmail li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr marazında bi-emrillâhi te‘âlâ vefâtımdan sonra terekemin sülüsü ifrâz olunup içinden techîz ve tekfînime ve yevm-i mevtimde ve üçümde ve yedimde ve kırkımda ve senemde tabh-ı ta‘âm olunup fukarâ-yı Müslimîn i‘tâm oluna deyü vasiyet ve ikrâr ve tenfîze beni vasî-i muhtâr nasb ve ta‘yîn ve ol dahi kabûl eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle hükmolunup mâ vaka‘a biˈt-taleb ketb olundu. Fî 20 min-Zilhicce sene [10]84. Şuhûdüˈl-hâl: es-Sâbıkūn