Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 614 Hüküm no: 426 Orijinal metin no: [101b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ahmed Çelebi’nin çocuklarına yeni vasî tayin olan Ahmed Bey’in, eski vasî Hüseyin Bey’den çocuklara ait tereke ve paraları teslim aldığı Mahmiye-i Galata a‘mâlinden kasaba-i Kasımpaşaˈda Tahtakādı mahallesinde sâkin iken bundan [akdem] vefât eden Ahmed Çelebi b. Mehmedˈin sagīr oğlu Mehmed ve sagīre kızı Fatma ve zevcesi batnında mevcûd hamlin tesviye-i emirlerine kıbel-i şer‘den mansûb vasîleri olan Ahmed Bey b. Halil meclis-i şer‘-i hatîrde işbu bâ‘isüˈl-vesîka Hüseyin Beşe b. Mustafa mahzarında biˈl-vesâye ikrâr ve takrîr-i kelâm edip vasîleri olduğun sagīrân-ı mezbûrân ile haml-i mezkûrun mezbûr Hüseyin Beşe vasîleri olmağla ber-mûceb-i defter-i kassâm-ı askerî makbûzu ve zimem-i nâs ve bedel-i kitâbetden ba‘de edâiˈd-deyn ve ba‘de edâiˈn-nafakatiˈl-mefrûza ve ihrâc-ı mesârifiˈl-mühimme mezbûr Hüseyin Beşe yedinde bâkī kalan elli iki esedî guruş nakd ve her biri otuz sekizer paradan kırkar esedî olmak üzere bin beş yüz yirmi Mısır parası ki cem‘an on bir bin cedîd akçe ve bedel-i kitâbetden on altı [bin] yüz kırk akçe ve bin sekiz yüz yetmiş akçe zimemden cem‘an yirmi dokuz bin akçe makbûz ve makbûlü olmağla hâlâ mezbûr Hüseyin Beşeˈnin yerine ben vasî nasb olunmağla biˈl-vesâye merkūm Hüseyin Beşe yedinden on bir bin kırk beş akçe sağ olmak üzere elli iki esedî ve kırk guruş olmak üzere bin beş yüz yirmi Mısır parası ve dört an nakd kabz edip ve bin sekiz yüz yetmiş akçe zimemden yerli yerinden gösterip ve on altı bin yüz kırk akçe bedel-i kitâbetden gösterdikde ben dahi biˈl-vesâye kabûl eylediğimden sonra mezbûr Hüseyin Bey yedinde mal-ı sıgārlardan bir akçe ve bir habbe bâkī kalmadı dedikde gıbbeˈt-tasdîk mâ vaka‘a biˈt-taleb ketb olundu. Fiˈs-sâlis veˈl-işrîn min-Zilhicce li-sene erba‘a ve semânîn ve elf. Şuhûdüˈl-hâl: Ahmed Ağa kethudâ-i Pîri, Derzi Mehmed Çelebi b. Mahmud, Bekir Beşe, Abdullah Beşe b. Ahmed, Derzi Hasan Beşe b. Hüseyin, Kazzâz Mehmed Beşe b. Yusuf, Derzi Ali b. Mustafa