Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 615 Hüküm no: 427 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın kendisine babasından intikal eden ev hissesini Hasan Efendi’ye sattığı Husûs-ı âtiˈl-beyânı mahâllinde tahrîri iltimâs olunmağın savb-ı şer‘den Mevlânâ el-Hâc Mehmed Efendi b. Hasan Efendi irsâl olunup ol dahi mahmiye-i Galata hâricinde Müeyyedzâde mahallesinde sâkin -umdetüˈl-emâcid veˈl-ekârim- Abdullah Ağa b. Hasan Ağaˈnın menziline varıp zeyl-i vesîkada isimleri muharrer olan Müslimîn huzûrlarında akd-i meclis-i şer‘-i hatîr eyledikde müşârün-ileyh Abdullah Ağa meclis-i ma‘kūd-ı mezbûrda işbu kitâb-ı sıhhat-nisâbın sahibi olup hâlâ Âsitâne-i sa‘âdetˈde Şıkk-ı Evvel defterdârı kā’immakāmı olan iftihârüˈl-e‘âzım veˈl-ekârim muhtârüˈl-emâcid veˈl-ekârim sa‘âdetlü Hasan Efendi b. Süleyman taraf-ı şerîflerinden ikrâr-ı câ’iˈz-zikri tasdîka vekîl olup bimâ-hüve nehciˈs-sübût şer‘an vekâleti sâbite ve hâlâ atabe-i aliyyede rûznâmçe-i evvel halîfesi olan mefhar-ı erbâbüˈt-tahrîr veˈl-kalem -zübdetü ashâbiˈt-tastîr veˈr-rakam- Ağazâde demekle meşhûr Mehmed Efendi b. Hüseyin Ağa mahzarında ikrâr-ı tâm ve takrîr-i kelâm mahmiye-i mezbûre dâhilinde Sultân Bâyezid mahâllinde [mahallesinde] vâki‘ olup işbu akdin sudûruna değin silk-i mülk-i sahîhinde münselik taht-ı yedimde ve kabz-ı tasarrufumda olan bir tarafdan Mustafa Çelebi Vakfıˈna ve bir tarafdan Belkıs Hanım Vakfıˈna ve iki tarafdan tarîk-i âmma müntehî dört değirmen çarhı ve içinde mevcûd âlât-ı lâzıme-i mühimme ve bi’r-i mâ ve battal fırın yerini müştemil mülkde vâki‘ babam mûmâ-ileyh Hasan Ağaˈdan müntakil bir buçuk sehim hisse-i şâyi‘amı müvekkil-i müşârün-ileyh Hasan Efendi Hazretlerine tarafeynden îcâb ve kabûlü hâvî bey‘-ı bâtt-ı sahîh-i şer‘î ile dört yüz yirmi beş kıt‘a esedî guruşa bey‘ ve teslîm edip anlar dahi vech-i muharrer üzere iştirâ ve kabûl ve tesellüm eylediklerinde semeni olan meblağ-ı mezbûr dört yüz yirmi beş esedî guruşu müvekkil-i mûmâ-ileyh hazretlerinin yed-i kerîmelerinden biˈt-tamam veˈl-kemâl ahz ve istifâ eyledim ba‘deˈl-yevm sâlifüˈz-zikr değirmen çarhı ve içinde mevcûd âlât-ı lâzıme-i mühimme ve bi’r-i mâ ve battal fırın yerinde olan bir buçuk sehim hisse-i şer‘iyem müşârün-ileyh Hasan Efendi Hazretlerinin mülk-i müşterâsıdır keyfe mâ yeşâ’ ve hasbemâ yürîd mutasarrıf olsunlar dedikde gıbbeˈt-tasdîkiˈş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan İsa Bey b. Halil ve Hüseyin b. Ali ile meclis-i şer‘a gelip alâ-vukû‘ihî inhâ etmeğin mâ vaka‘a biˈt-taleb ketb olundu. Fiˈl-yevmiˈs-sâbi‘ veˈl-işrîn min-Zilhiccetiˈş-şerîfe li-sene erba‘a ve semânîn ve elf. Şuhûdüˈl-hâl: Abdülhâlik Efendi b. Mehmed Efendi, Fethullah Çelebi b. Nimetullah, el-Hâc Ahmed b. Abdülhay Efendi, el-Hâc Mustafa b. Abdi Efendi, Mahmud Efendi Hoca-i Saray-ı Galata, Ali Çelebi Filibeli er-râcil, Mehmed Çelebi b. Mehmed, Murtezâ Çelebi b. Abdullah, İslâm Beşe b. Abdullah, Dilaver b. Abdullah