Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 670 Hüküm no: 473 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Efendi’nin, merhume Cinane’nin, babası Halil’in azatlı kölesi olduğunu iddia ederek beytülmal emininden terekeyi talep ettiği Mahmiye-i İstanbulˈda Sofular mahallesi sükkânından bâ‘isüˈl-kitâb Abdüllatif Efendi b. Halil Efendi nâm kimesne meclis-i şer‘-i hatîrde mahrûse-i Galataˈya tâbi‘ kasaba-i Kasımpaşa ve Kamer Hatun mahallesi sâkinelerinden iken bundan akdem vefât eden Cinâne bt. Abdullah nâm hatunun zâhirde vâris-i ma‘rûfu olmamak zuʻmıyla muhallefâtına vâzi‘uˈl-yed olan beytü’l-mâl emîni Mehmed Ağa b. Ali Ağa nâm kimesne mahzarında üzerine da‘vâ ve takrîr-i kelâm edip müteveffât-ı mezbûre Cinâne Hatun babam müteveffâ-yı mezbûr Halil Efendi‘nin mu‘tekası olmağla müteveffât-ı mezbûrenin asabesi sebebiyesi ve hasren vârisi olmağın hâlâ emîn-i mezbûra suâl olunup muhallefât-ı mezbûreyi bana teslîme tenbîh olunmak matlûbumdur dedikde gıbbeˈs-suâl emîn-i mezbûr cevâbında müteveffâ-yı mezbûrenin muhallefâtına vaz‘-ı yedini ikrâr lâkin müdde‘î-i mezbûrun vech-i tahrîr üzere hasren vârisi olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-ı Müslimînˈden olup es-Seyyid Abdülkerim b. es-Seyyid Süleyman ve Mehmed Beşe b. Abdullah nâm kimesneler li-ecliˈş-şehâde meclis-i şer‘a hâzırân olup istişhâd olunduklarında fiˈl-hakīka müteveffât-ı mezbûre Cinâne Hatun müdde‘î-i mezbûrun babası merkūm Halil Efendiˈnin mu‘takası olmağla müdde‘î-i mezbûr müteveffât-ı merkūmenin asabe-i nesebiyesi ve hasren vârisidir müdde‘î-i merkūmdan gayri vârisi ve terekesine müstehakk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde gıbbeˈt-ta‘dîl veˈt-tezkiye şehâdetleri makbûle olmağın mûcibince müdde‘î-i mezbûrun vech-i muharrer üzere vârisine ba‘deˈl-hükm muhallefât-ı merkūmeyi müdde‘î-i merkūma teslîm etmek mesfûra tenbîh birle mâ vaka‘a biˈt-taleb ketb olundu. Fî-gurreti Saferiˈl-hayr li-sene hamse ve semânîn ve elf. Şuhûdüˈl-hâl: İbrahim Çelebi b. Abdülbaki, Mustafa b. Abdullah, Hasan Çelebi b. Ali, İsa Bey b. Receb, Ahmed Beşe b. Osman