Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 679 Hüküm no: 483 Orijinal metin no: [113a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varislere intikal eden çiftlik ve içindeki hayvan ve hububatın varislerden Âbide’nin kocası Ahmed Ağa’ya satıldığı Husûs-ı âtiˈz-zikrin mahâllinde tahrîri iltimâs olunmağın kıbel-i şer‘-i enverden Mevlânâ Ömer Efendi b. Ali irsâl olunup ol dahi mahrûse-i Galata muzâfâtından kasaba-i Beşiktaşˈda Kuruçeşme nâm karye ahâlîsinden bundan akdem vefât eden mastûrüˈl-esâmî olan Müslimîn huzûrunda akd-i meclis-i şer‘-i hatîr ettikde müteveffâ-yı mezbûrun verâseti vâlidesi Belkıs bt. Abdullah ile sulbiye kızları Âbide ve Rukiyeˈye ve li-eb kız karındaşı Hadîce Hanımˈa münhasıra tashih-i mes’eleleri altı sehimden i‘tibâr olunup sihâm-ı mezbûreden bir sehmi vâlidesi mezbûre Belkısˈa ve ikişer sehmi merkūmetân Âbide ile Rukiyeˈden her birine ve bir sehmi dahi kız karındaşı mersûme Hadîce Hanımˈa intikāl ve isâbet eylediği şer‘an zâhir ve mütehakkık oldukdan sonra mezkûre Hadîce Hanım meclis-i ma‘kūd-ı mezbûrda merkūmetân Âbide ve Rukiye taraflarından husûs-ı âtiˈl-beyâna vekîlleri olup vekâleti mezbûretânın zâtlarını ma‘rifet-i şer‘iye ile ârifân olan Mehmed Çelebi b. Süleyman Efendi ve Mustafa b. Abdullah nâm kimesneler şehâdetleri ile şer‘an sâbite olan mezbûre Âbideˈnin zevci Ahmed Ağa b. Mehmed nâm kimesne mahzarında ikrâr-ı tâm ve takrîr-i kelâm edip mûrisimiz müteveffâ-yı mezbûrun mülkü olup karye-i mezbûrede vâki‘ bir tarafdan Tırnakçı Paşa Vakfıˈna ve bir tarafdan [113b] sâhil-i bahra ve bir tarafdan mezbûretân Âbide ve Rukiye mülklerine ve bir tarafdan tarîk-i âm ile mahdûd olup eşcâr-ı müsmire ve gayr-ı müsmireyi muhtevî bağçeden ve bi’r-i mâ’-i cârî ve büyût-ı adîdeyi müştemil menzilden ve yine karye-i mezbûreyi vâki‘ ledeˈl-ahâlî veˈl-cîran ma‘lûmüˈl-hudûd iki kıt‘a bağdan ve havâss-ı aliyye kazâsı muzâfâtından Çekmece-i sagīrâna tâbi‘ Ankorya nâm ovada vâki‘ kezâlik ma‘lûmüˈl-hudûd çiftlik ta‘bîr olunur mülk menzil içinde mevcûd olan yirmi re’s kara sığırdan ve yirmi keyl dakīkden ve âlet-i hasâtdan ber-vech-i muharrer altı sehimde bana isâbet ve intikāl eden südüs hisse-i irsiye-i şerʻiyye şâyiʻâlarımı cümle tevâbiʻ ve levâhıkları ile bi-safkatin vâhidetin sekiz yüz elli esedî guruşa müvekkiletân-ı merkūmetânın vekîlleri olan işbu mezbûr Ahmed Ağaˈya bey‘ ve teslîm ol dahi müvekkileleri içün vech-i meşrûh üzere iştirâ ve tesellüm eylediğinden sonra semeni olan meblağ-ı mezbûr sekiz yüz elli esedî guruşu mezbûr Ahmed Ağa yedinden biˈt-tamam ve ahz u kabz eyledim ba‘deˈl-yevm bâlâda zikri sebk eden eşyâ-i mezbûrede benim içün hak ve alâka kalmayıp müvekkiletân-ı mezbûretânın mülkleridir dedikde gıbbeˈt-tasdîk husûs-ı mezkûru mevlânâ-yı mezbûr Ömer Efendi mahâllinde tahrîr ma‘an ba‘d ba‘s olan Hüseyin Çelebi b. Ali ile meclis-i şer‘a gelip vukû‘ı üzere inhâ eylediklerinde mâ vaka‘a biˈt-taleb ketb olundu. Fî-gurreti Saferiˈl-hayr li-sene hamse ve semânîn ve elf. Şuhûdüˈl-hâl: eş-Şeyh Ahmed Efendi b. İsmail, es-Seyyid Lütfullah b. es-Seyyid Emrullah Efendi, Ahmed Çelebi b. Hüseyin, Mustafa Ağa Haseki, Hasan Efendi b. İshak, Mehmed Efendi b. Süleyman el-imâm, Ahmed Çelebi b. Hüseyin, Abdülkadir b. Mehmed, Mehmed Çelebi b. Habib, Hüseyin Çelebi b. Ali, Mustafa b. Hasan. Mehmed Bey b. Güzelce Ali Paşaˈnın menziline varıp zeyl-i vesîkada