Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 678 Hüküm no: 482 Orijinal metin no: [113a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma’nın, annesi Ayşe’den intikal eden ev hissesi ve mehir akçesi konusunda babası Osman Beşe ile anlaştıkları Medîne-i Hazret-i Eyûb mahallâtından Evlicebaba mahallesinde sâkin iken bundan akdem vefât eden Âişe bt. Bülbül nâm hatunun verâseti zevc-i metrûku Osman Beşe b. Mehmed ile sadrî kebîr oğlu Yusuf ve sagīr oğlu Mahmudˈa ve kebîre kızı Fatmaˈya münhasıra olup kableˈl-kısme mezbûr Mahmud dahi fevt olup verâseti ancak babası mezbûr Osman Beşeˈye münhasıra olduğu şer‘an zâhir ve müte‘ayyin oldukdan sonra mezbûre Fatma meclis-i şer‘de işbu râfi‘üˈr-rakīm mezbûr Osman Beşeˈnin iki yüz akçe kıymetli iki döşek ve üç yorgan ve üç tencere ve on beş bin akçe kıymetli mahalle-i mezbûrede vâki‘ bir tarafdan ba‘zan Yusuf Beşe ve ba‘zan Yazıcı Ali mülkleri ve bir tarafdan Karcı nâm Mehmed Çelebi mülküne ve iki tarafdan tarîk-i âmma müntehî dört bâb tahtânî oda ve bi’r-i mâ’ı ve iki bağçeyi müştemil mülk menzilini kabz ettikden sonra zimmetinde mütekarrer olan bin dört yüz akçe mehr-i müecceli ile müteveffât-ı merkūmenin cem‘an on yedi bin yedi yüz akçe kıymetli terekesi müctemi‘ oldukdan sonra meblağ-ı mezbûrdan beynimizde ma‘lûm ba‘zı mesârif-i lâzımesi’çün yüz yetmiş akçeyi ihrâç ettiğimizden sonra bâkī kalan on altı bin dokuz yüz otuz akçeden benim iki bin beş yüz otuz akçe hissem mukābelesinde babam mezbûr Osman Beşe menzil-i mezbûrun makābir-i Müslimîn tarafında olan bir tahtânî oda ve tarîk-i âmma varınca mâ-beyninde olan arsa ve bi’r-i mâ’ı bana ta‘yîn ve tahsîs ve ben dahi ba‘deˈl-kabûl alâmât-ı fâsıla vaz‘ olundukdan sonra babam mezbûr Osman Beşe ile anam müteveffât-ı merkūmenin terekesine müte‘allika da‘vâ ve nizâ‘ım kalmayıp menzil-i mezbûrda ve tereke-i menkūle ve mehr-i mezkûrede olan mâ‘adâ husûmem mutâlebesinden babam mezbûrun zimmetini ibrâ’-i âm ile ibrâ’ ve ıskāt eyledim dedikde gıbbeˈt-tasdîkiˈş-şer‘î mâ hüveˈl-vâki‘ biˈt-taleb ketb olundu. Fî-Saferiˈl-hayr li-sene hamse ve semânîn ve elf. Şuhûdüˈl-hâl: Abdullah Efendi b. Abdullah, İvaz Beşe b. Ali, Yusuf b. Abdullah, Mehmed Beşe b. Receb, Mehmed Çelebi Karcıbaşı, İsa Bey b. Halil, Hüseyin Çelebi b. Ali ve gayruhum.