Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 681 Hüküm no: 485 Orijinal metin no: [113b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâdısabâ’nın, kocası merhum Mustafa zimmetindeki mehrini, diğer varislerden talep ettiği Mahmiye-i Galata dâhilinde Okçu Musa mahallesinde sâkin iken bundan akdem vefât eden el-Hâc Mustafa b. Mehmed nâm kimesnenin verâseti zevce-i metrûkesi Bâdısabâ bt. Abdullah [nâm] hatun ile li-ebeveyn er karındaşları el-Hâc Mahmud ve Ali Çelebi nâm kimesnelere münhasıra olduğu şer‘an zâhir ve mütehakkık oldukdan sonra bâ‘isetüˈl-kitâb mezbûre Bâdısabâ meclis-i şer‘de tereke-i müteveffâ-yı mezbûra vâzi‘uˈl-yed olan mezbûrân el-Hâc Mahmud ve Ali Çelebi mahzarlarında üzerlerine da‘vâ ve takrîr-i kelâm edip zevcim müteveffâ-yı mezbûr zimmetinde ma‘kūdun-aleyh olan üç bin beş yüz mehr-i müeccelimi kableˈl-istifâ fevt olmağla hâlâ mezbûrânın yedlerinde olan mezbûrun muhallefâtından taleb ederim suâl olunsun dedikde gıbbeˈs-suâl merkūmân cevâblarında fiˈl-hakīka mezbûre Bâdısabâˈnın vech-i muharrer üzere meblağ-ı mezbûr müteveffâ-yı merkūmun deynidir deyü her biri ikrâr ve i‘tirâf etmeğin alâ-mûceb-i i‘tirâfihimâ meblağ-ı mezbûru merkūme Bâdısabâˈya edâ ve teslîme mezbûrâna ba‘deˈt-tenbîh mâ vaka‘a biˈt-taleb ketb olundu. Fiˈl-yevmiˈs-sâbi‘-i aşer min-Saferiˈl-hayr li-sene hamse ve semânîn ve elf. Şuhûdüˈl-hâl: Ali Beşe b. Halil, Hüseyin Çelebi b. Ali, Hasan Efendi b. İshak, Ahmed Çelebi b. Osman