Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 684 Hüküm no: 489 Orijinal metin no: [114b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüma Hatun’un, merhum Kaymak Mehmed Kapudan’daki alacağını varislerden talep ettiği İşbu râfi‘atüˈr-rakīm Hümâ Hatun bt. Ali meclis-i şer‘-i şerîfde mahmiye-i Galata hâricinde Şahkulu mahallesinde sâkin iken bundan akdem vefât eden Kaymak Mehmed Kapudan b. Rıdvanˈın verâseti zevce-i metrûkesi Âişe Hanım bt. Mehmed ile vâlidesi Hadîce bt. Hüseyinˈe münhasıra olduğu şer‘an zâhir ve müte‘ayyin oldukdan sonra anası merkūme Hadîce mahzarında üzerine da‘vâ ve takrîr-i kelâm edip müteveffâ-yı mezbûr zimmetinde karzdan olan altmış esedî guruş hakkımı kableˈl-istifâ vefât edip hâl-i hayatında meblağ-ı mezbûr bana deyni olduğunu huzûr-ı Müslimînˈde ikrâr ve işhâd dahi etmekle hâlâ terekesine vâzi‘atüˈl-yed olan mezbûre Hadiceˈden taleb ederim suâl olunsun dedikde gıbbeˈs-suâl veˈl-inkâr ve ba‘deˈt-taleb udûl-ı Müslimînˈden el-Hâc Hüseyin b. Memi ve Halil Beşe b. Hasan nâm kimesneler li-ecliˈş-şehâde meclis-i şer‘a hâzırân [olup] isreˈl-istişhâd fiˈl-hakīka müteveffâ-yı mezbûr hayatında karzdan mezbûra altmış esedî guruş zimmetimde deynim vardır deyü huzûrumuzda ikrâr ve bizi işhâd dahi eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre Hümâ Hatun ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-hâmis-i aşer min-Saferiˈl-hayr li-sene hamse ve semânî ve elf. Şuhûdüˈl-hâl: Mâ-sebak